Pas javësh me temperatura të larta, toka të thara dhe fusha të nxira, Zvicra po pret reshjet e shumëpritura. Meteorologu Peter Wick paralajmëron se gjatë ditëve në vijim mund të ketë reshje të konsiderueshme, por ato nuk janë të mjaftueshme për të rikthyer menjëherë ekuilibrin e humbur të ujit. Sipas parashikimit, gjatë së hënës priten reshje të përhapura, herë pas here të shoqëruara me stuhi. Deri në mbrëmje, në varësi të rajonit, mund të bien nga rreth 5 deri në 40 litra shi për metër katror. Reshje të tjera priten edhe më vonë gjatë javës, transmeton 20min.ch. Megjithatë, ekspertët theksojnë se disa ditë me shi nuk mjaftojnë për të kompensuar thatësirën e krijuar gjatë javëve dhe muajve të fundit. Shtresat e sipërme të tokës, kopshtet dhe livadhet mund të përfitojnë shpejt, por për ujërat nëntokësore nevojitet një periudhë shumë më e gjatë me reshje të rregullta.
Më mirë 5–10 litra çdo ditë sesa 50 litra për një orë.
Ky është skenari që do të ndihmonte më shumë natyrën. Një shi i qetë dhe i vazhdueshëm depërton gradualisht në tokë dhe mund të arrijë në shtresat më të thella. Në të kundërt, shirat e rrëmbyeshëm të stuhive mund të shkaktojnë probleme të reja.
Toka e tharë dhe e fortësuar mund të mos e përthithë ujin mjaftueshëm shpejt. Një pjesë e madhe e reshjeve mund të rrjedhë në sipërfaqe, duke mbingarkuar rrugët, kanalizimet dhe përrenjtë e vegjël. Kështu, ndërsa një zonë mund të përballet me përmbytje të shpejta ose vërshime, vetëm disa kilometra më tej mund të vazhdojë thatësira.
Rrezik edhe për fundin e verës dhe vjeshtën
Ecuria e motit gjatë javëve të ardhshme do të jetë vendimtare. Nëse reshjet vazhdojnë në mënyrë të moderuar dhe të rregullt, situata mund të përmirësohet gradualisht. Por nëse pas reshjeve kthehen temperaturat e larta dhe thatësira, rreziku mund të mbetet i madh.Në rast të reshjeve intensive, sidomos në zonat malore, mund të shfaqen edhe rrëshqitje dheu, rrëke të fuqishme. Pas një periudhe të gjatë thatësire, materiali i lirshëm në terren mund të zhvendoset shpejt nga uji. Në lartësi të mëdha, një faktor tjetër është shkrirja e permafrostit. Me zhdukjen e akullit në nëntokë, disa zona mund të humbasin stabilitetin, duke rritur rrezikun për rënie gurësh dhe murgange gjatë reshjeve të forta.
Skenari ideal: shi i qetë për disa javë
Sipas meteorologut Wick, skenari më i favorshëm do të ishte një periudhë prej disa javësh me reshje të rregullta dhe të shpërndara, të shoqëruara me temperatura të këndshme rreth 20–25 gradë Celsius.
Kjo do t’u jepte kohë tokës, pyjeve, bujqësisë dhe ujërave nëntokësore të rikuperohen.
Pra, shiu që po vjen është një lajm i mirë, por jo ende fundi i krizës së thatësirës. Për Zvicrën, sfida kryesore nuk është vetëm sa shi bie, por si dhe për sa kohë bie ai. Nëse reshjet ndalen pas disa stuhive lokale dhe rikthehet nxehtësia, vendi mund të përballet me një situatë paradoksale: thatësirë e madhe në të njëjtën kohë me përmbytje lokale, transmeton 20min.ch, përcjell helveticALforum.ch.
Foto ilustrim
