Bernë, Zvicër – Reshjet e dendura, stuhitë e forta dhe breshëri kanë përfshirë pjesë të mëdha të Zvicrës, duke shkaktuar përmbytje, ndërprerje të transportit rrugor dhe hekurudhor, si dhe qindra ndërhyrje të shërbimeve të emergjencës, transmeton 20min.ch. Autoritetet federale kanë paralajmëruar se gjatë së mërkurës priten stuhi të reja në disa rajone të vendit. Në disa zona është shpallur niveli 4 i rrezikut, që nënkupton rrezik të madh nga moti ekstrem, ndërsa për pjesën më të madhe të Zvicrës mbetet në fuqi niveli 3 i alarmit deri në orën 20:00. Gjatë natës, moti i keq shkaktoi probleme të shumta në disa kantone. Në kantonin Uri, autostrada A2 u mbyll përkohësisht për shkak të përmbytjeve, ndërsa kalimi malor Sustenpass u bllokua pas një rrëshqitjeje gurësh dhe dheu.
Në kantonin e Cyrihut, reshjet intensive detyruan zjarrfikësit të kryenin mbi 700 ndërhyrje. Zonat më të prekura ishin Cyrihu-Veri, Wallisellen, Dübendorf dhe Rafz, ku u raportuan dhjetëra përmbytje në rrugë, bodrume dhe nënkalime. Edhe transporti publik u ndikua nga moti i keq. Në kantonin Obwalden u ndërpre përkohësisht qarkullimi i trenave në linjat IR dhe S5 ndërmjet Alpnach Dorf dhe Alpnachstad. Ndërkohë, Aeroporti i Cyrihut pezulloi operimet për rreth dy orë gjatë mbrëmjes së kaluar. Si pasojë, shumë fluturime u vonuan ose u devijuan drejt aeroporteve të tjera, duke shkaktuar probleme për mijëra pasagjerë. Stuhitë goditën edhe qytetin e Bernës në orët e para të mëngjesit, ku u raportuan reshje të rrëmbyeshme, breshër dhe rrëzim pemësh. Në Wallisellen, një nënkalim u përmbyt plotësisht, duke bllokuar një automjet, ndërsa drejtuesi i tij arriti të shpëtojë pa lëndime. Moti i keq ndikoi edhe në aktivitetet publike. Koncerti i grupit amerikan Linkin Park, i mbajtur në stadiumin Letzigrund të Cyrihut, u ndërpre përkohësisht për shkak të breshërit dhe erërave të forta, përpara se të rifillonte më vonë. Meteorologët paralajmërojnë se gjatë ditës priten ende stuhi të forta lokale, veçanërisht në Zvicrën Qendrore dhe Lindore, ku rreziku për reshje intensive dhe përmbytje mbetet i lartë. Autoritetet u bëjnë thirrje qytetarëve të shmangin udhëtimet e panevojshme dhe të ndjekin njoftimet zyrtare për zhvillimin e situatës, transmeton 20min.ch, përcjell helveticALForum.ch.
(Foto Adi Hebibi)
