ANSAMBLI “TROJET” NGA WINTERTHURI DHE ANSAMBLI “BAJRAM CURRI” NGA PRISHTINA ZYRTARIZOJNË BINJAKËZIMIN KULTUROR E ARTISTIK!
Prishtinë, 14 tetor 2026 – Me kënaqësi dhe krenari të veçantë njoftojmë anëtarët, prindërit, bashkëpunëtorët, miqtë tanë dhe mediat se Ansambli “TROJET” nga Winterthuri i Zvicrës dhe Ansambli Kulturor-Artistik “BAJRAM CURRI” nga Prishtina kanë zyrtarizuar marrëveshjen e binjakëzimit dhe bashkëpunimit kulturor e artistik. Ky binjakëzim, i arritur me vullnetin dhe iniciativën e përbashkët të të dy ansambleve, shënon një hap të rëndësishëm në rrugëtimin tonë artistik dhe në forcimin e lidhjeve ndërmjet atdheut dhe mërgatës.
Më shumë se një marrëveshje, ky binjakëzim përfaqëson një mision të përbashkët për ruajtjen, kultivimin dhe përcjelljen e trashëgimisë sonë kombëtare te brezat e ardhshëm. Përmes këtij partneriteti synojmë shkëmbimin e përvojave artistike, pasurimin e repertorit folklorik, bashkëpunimin ndërmjet koreografëve dhe artistëve, si dhe organizimin e aktiviteteve dhe paraqitjeve të përbashkëta kulturore në Kosovë, Zvicër dhe më gjerë.
Një falënderim i veçantë i takon Ansamblit “BAJRAM CURRI”, drejtuesve dhe anëtarëve të tij, për besimin, gatishmërinë dhe përkushtimin e treguar. Jemi të bindur se ky partneritet do të sjellë projekte të rëndësishme, miqësi të qëndrueshme dhe suksese të përbashkëta. Mirënjohje gjithashtu Kryesisë së Ansamblit “TROJET” për mbështetjen dhe angazhimin e vazhdueshëm në zhvillimin e veprimtarisë sonë kulturore.
Sukseset e deritanishme na bëjnë krenarë, por përgjegjësia jonë më e madhe mbetet trashëgimia që do t’u lëmë brezave që vijnë.
Nga Winterthuri në Prishtinë, po ndërtojmë një urë të re miqësie, bashkëpunimi dhe atdhedashurie. Sepse largësia mund të na ndajë gjeografikisht, por kënga, vallja, gjuha dhe tradita shqiptare na mbajnë gjithmonë të bashkuar!
Me respekt dhe mirënjohje,
Ansambli “TROJET”
Winterthur, Zvicër
