Përfaqësuesit e Forcave të Armatosura të Shqipërisë marrin pjesë në një nga forumet më të rëndësishme të ushtrisë dhe industrisë së mbrojtjes në Amerikën e Veriut, me fokus modernizimin, inovacionin dhe forcimin e bashkëpunimit me SHBA-në dhe aleatët e NATO-s.
WASHINGTON D.C. – Komandanti i Forcës Tokësore, gjeneralmajor Petrit Çuni, së bashku me drejtorin e Përgjithshëm të Drejtorisë së Modernizimit të Kapaciteteve dhe Armatimit në Ministrinë e Mbrojtjes, gjeneral brigade Ardian Lilo, po marrin pjesë në aktivitetin AUSA Annual Meeting & Exposition 2026, që zhvillohet në kryeqytetin amerikan. Ky aktivitet konsiderohet një nga forumet kryesore të ushtrisë në Amerikën e Veriut, duke mbledhur drejtues ushtarakë, përfaqësues të vendeve aleate dhe partnere, si dhe kompani të industrisë së mbrojtjes, për të diskutuar mbi zhvillimet dhe sfidat e sigurisë. Sipas të dhënave të bëra publike nga organizatorët e aktivitetit, forumi bashkon mbi 40 mijë pjesëmarrës, më shumë se 750 ekspozues dhe përfaqësues nga mbi 100 vende.
Modernizimi dhe ndërveprueshmëria në fokus
Pjesëmarrja e përfaqësuesve të Forcës Tokësore shqiptare synon të kontribuojë në forcimin e bashkëpunimit me Ushtrinë Amerikane dhe aleatët e NATO-s, si dhe në shkëmbimin e përvojave për modernizimin e kapaciteteve ushtarake.
Një ndër objektivat kryesore është njohja me zhvillimet e fundit teknologjike dhe zgjidhjet inovative në fushën e mbrojtjes, të cilat mund të ndihmojnë në përmirësimin e pajisjeve, sistemeve dhe aftësive operacionale.
Në kuadër të këtij aktiviteti, përfaqësimi shqiptar synon gjithashtu të përcjellë prioritetet e vendit për modernizimin e Forcës Tokësore dhe zhvillimin e kapaciteteve në përputhje me angazhimet në Aleancën Atlantike.
Forcimi i partneritetit strategjik Shqipëri-SHBA
Pjesëmarrja në AUSA 2026 shihet si një mundësi për të zgjeruar kontaktet me partnerët ndërkombëtarë dhe për të thelluar bashkëpunimin në fushën e mbrojtjes.
Partneriteti me Shtetet e Bashkuara të Amerikës dhe ndërveprueshmëria me forcat e NATO-s përbëjnë elemente të rëndësishme të zhvillimit të kapaciteteve ushtarake shqiptare.
Përmes përfaqësimit në këtë forum, Forca Tokësore synon të mbajë në vëmendje nevojat për modernizim dhe inovacion, si dhe të forcojë lidhjet me institucionet ushtarake dhe industrinë ndërkombëtare të mbrojtjes. Aktiviteti AUSA Annual Meeting & Exposition shërben si një platformë për diskutimin e teknologjive të reja, zhvillimeve strategjike dhe sfidave të sigurisë, duke krijuar mundësi për shkëmbim përvojash mes ushtrive aleate dhe partnere, njofton forca Tokësore nga Ministria e Mbrojtjes, përcjell helveticALforum.ch.
