Ministrja e Arsimit, Mirela Kumbaro, u ka bërë thirrje prindërve të tregojnë kujdes dhe të mos lejojnë përfshirjen e fëmijëve në situata të dhunshme, ndërsa thekson se mësimi në shkolla vijon normalisht.
Ministrja e Arsimit, Mirela Kumbaro, ka reaguar përmes një mesazhi drejtuar prindërve, në një kohë kur protestat dhe tensionet janë përhapur në disa qytete të Shqipërisë.
Përmes këtij mesazhi, Kumbaro ka theksuar se mësuesit janë në krye të detyrës dhe se procesi mësimor po vijon në shkolla. Ajo u ka bërë thirrje prindërve që të tregojnë kujdes të shtuar për sigurinë e fëmijëve dhe të shmangin përfshirjen e tyre në situata që mund të përbëjnë rrezik.
“Të dashur prindër, arsimtarët janë në krye të detyrës, shkollat vijojnë mësimin. Të mos lejojmë që fëmijët tanë të përdoren për qëllime të errëta e të dhunshme, duke i vënë vetë fëmijët në rrezik”, shkruan ministrja.
Mesazhi i Kumbaros vjen në një klimë të tensionuar, teksa protestat kanë nxitur shqetësime për sigurinë publike dhe për ndikimin e tyre te të rinjtë.
Ministrja ka vënë në fokus përgjegjësinë e prindërve për të mbrojtur fëmijët dhe për të mos i ekspozuar ndaj situatave të dhunshme, ndërsa ka bërë të ditur se personeli arsimor vijon angazhimin e tij në institucionet shkollore.
Ndërkohë, zhvillimet në vend mbeten nën vëmendjen e institucioneve, ndërsa siguria e nxënësve dhe vazhdimësia e procesit mësimor mbeten çështje të rëndësishme në këtë situatë./TCH
