CYRIH – Konsullata e Republikës së Kosovës në Cyrih ka njoftuar se të premten, më 5 qershor 2026, nuk do të jetë e hapur për qytetarët për shkak të angazhimeve që lidhen me organizimin e Zgjedhjeve të Parakohshme për Kuvendin e Republikës së Kosovës, transmeton helveticALForum.ch. Sipas njoftimit zyrtar, gjatë kësaj dite do të pezullohen të gjitha shërbimet e rregullta konsullore. Megjithatë, përjashtimisht do të vazhdojë ofrimi i shërbimit për tërheqjen e dokumenteve personale, përfshirë pasaportat, letërnjoftimet dhe dokumente të tjera që tashmë kanë arritur në Konsullatë. Përfaqësuesit e Konsullatës kanë falënderuar bashkatdhetarët për mirëkuptimin dhe kanë kërkuar që qytetarët të planifikojnë vizitat e tyre në ditët e tjera të punës për shërbimet e zakonshme konsullore.
Ky vendim vjen në kuadër të përgatitjeve dhe angazhimeve institucionale për procesin zgjedhor, i cili kërkon mobilizim të shtuar të stafit diplomatik dhe konsullor, transmeton helveticALForum.ch.
