Prishtinë – Instituti i Historisë “Ali Hadri” në Prishtinë ka mirëpritur Ambasadorin e Japonisë në Republikën e Kosovës, Shkëlqesinë e Tij, Ambasadorin Tanigaki, në një takim ku në fokus ishte forcimi i bashkëpunimit akademik, shkencor dhe kulturor ndërmjet Kosovës dhe Japonisë. Gjatë takimit u diskutua për veprimtarinë shkencore dhe botuese të Institutit të Historisë, si dhe për rolin e tij në studimin, dokumentimin dhe promovimin e historisë së Kosovës.
Një pjesë e rëndësishme e bisedës iu kushtua mundësive për zhvillimin e projekteve të përbashkëta kërkimore dhe organizimit të konferencave, tryezave shkencore dhe aktiviteteve të tjera akademike e kulturore. Palët diskutuan gjithashtu për shkëmbimin e botimeve dhe materialeve shkencore, si një mënyrë për të nxitur komunikimin ndërmjet studiuesve dhe institucioneve akademike të të dyja vendeve.
Në takim u theksua edhe rëndësia e promovimit të historisë dhe kulturës së Kosovës dhe Japonisë, duke krijuar ura të reja bashkëpunimi dhe njohjeje ndërmjet dy shoqërive. Vizita e Ambasadorit Tanigaki në Institutin e Historisë “Ali Hadri” u vlerësua si një mundësi për të avancuar marrëdhëniet institucionale dhe për të identifikuar fusha konkrete të bashkëpunimit në shkencë, akademi dhe kulturë. Bashkëpunime të tilla synojnë të krijojnë mundësi të reja për studiuesit, institucionet kërkimore dhe komunitetet akademike të të dyja vendeve, duke kontribuar njëkohësisht në pasurimin e dialogut kulturor ndërmjet Kosovës dhe Japonisë, njofton Instituti i Historisë “Ali Hadri”, përcjell helveticAlforum.ch.
