Qeveria shqiptare ka miratuar projektligjin për krijimin e Liceut të Ri Francez në Korçë. Institucioni i ri do të jetë publik dhe falas për nxënësit, me orientim shkencor e teknologjik dhe mundësi për të marrë diplomën shqiptare dhe atë franceze.
Ka nisur zyrtarisht puna për ngritjen e Liceut të Ri Francez në qytetin e Korçës, një projekt që synon të forcojë bashkëpunimin arsimor mes Shqipërisë dhe Francës dhe të sjellë një model të ri të arsimit parauniversitar në vend.
Ministrja e Arsimit, Mirela Kumbaro, bëri të ditur se qeveria ka miratuar projektligjin për krijimin e këtij institucioni, i cili do të funksionojë si një gjimnaz publik me orientim shkencor dhe teknologjik.
Sipas ministres, projekti mbështetet në një marrëveshje mes dy qeverive dhe në nismën e përbashkët të presidentit francez Emmanuel Macron dhe kryeministrit shqiptar Edi Rama.
Kumbaro theksoi se përgatitjet për realizimin e projektit kanë nisur prej dy vitesh, gjatë të cilave Ministria e Arsimit ka punuar për hartimin dhe përafrimin e kurrikulave me sistemin arsimor francez.
Diplomë shqiptare dhe franceze
Një nga veçoritë kryesore të Liceut të Ri Francez në Korçë do të jetë mundësia që nxënësit të përfitojnë diplomën e maturës shqiptare dhe atë franceze, në bazë të marrëveshjes ndërmjet dy vendeve.
“Qeveria ka miratuar projektligjin për ndërtimin e Liceut Francez të Korçës, për krijimin e një institucioni të ri në arsimin parauniversitar”, deklaroi ministrja Kumbaro.
Ajo theksoi se bëhet fjalë për një shkollë të re, me kurrikula të përafruara me ato të Francës dhe me fokus të veçantë në shkencë e teknologji.
Mësimi do të zhvillohet në tri gjuhë: shqip, frëngjisht dhe anglisht, duke u ofruar nxënësve mundësi për të zhvilluar aftësi gjuhësore dhe për t’u përgatitur për studime të mëtejshme në Shqipëri, Francë dhe më gjerë.
Shkollë publike dhe falas për nxënësit
Ministrja e Arsimit bëri të ditur se liceu do të jetë institucion publik dhe nuk do të ketë tarifa shkollimi për nxënësit shqiptarë.
Përveç tyre, shkolla do të jetë e hapur edhe për nxënës nga vendet e rajonit, duke synuar të shndërrohet në një qendër të rëndësishme të bashkëpunimit arsimor.
Projekti parashikon krijimin e ambienteve të reja mësimore, përfshirë klasa, bibliotekë, laboratorë dhe mensë, me synimin për të siguruar kushte bashkëkohore për mësimdhënie dhe zhvillimin e aktiviteteve shkollore.
Mësues francezë dhe shqiptarë në të njëjtin institucion
Sipas Kumbaros, kuadri ligjor parashikon përdorimin e kurrikulave të njehsuara me ato franceze, si dhe përfshirjen e mësuesve francezë në procesin mësimor, përkrah mësuesve shqiptarë.
Mësuesit shqiptarë do të vazhdojnë të japin lëndë që lidhen me gjuhën, letërsinë dhe historinë e Shqipërisë, ndërsa organizimi i përgjithshëm synon të ndërthurë elementet e të dy sistemeve arsimore.
Kjo qasje pritet të krijojë një mjedis arsimor ndërkombëtar, duke ruajtur njëkohësisht përmbajtjen kombëtare të arsimit shqiptar.
Korça rikthen traditën e arsimit francez
Ngritja e liceut të ri lidhet edhe me traditën historike të qytetit të Korçës, i cili ka një histori të gjatë të lidhjeve arsimore dhe kulturore me Francën.
Përmes këtij projekti, synohet që kjo traditë të marrë një formë të re, të përshtatur me kërkesat bashkëkohore të arsimit dhe nevojat e tregut të punës.
Liceu Francez i Korçës pritet të jetë një investim i rëndësishëm në zhvillimin e arsimit parauniversitar, ndërsa hapat e mëtejshëm do të përcaktojnë organizimin konkret, funksionimin dhe hapjen e institucionit për nxënësit, transmeton rtsh.
