Cyrih, Zvicër – Reshjet e dendura të shiut dhe stuhitë e forta që goditën kantonin e Cyrihut kanë shkaktuar kaos në Aeroportin e Cyrihut, duke çuar në anulimin e rreth 70 fluturimeve dhe devijimin e mbi 30 avionëve drejt aeroporteve të tjera, transmeton 20min.ch, përcjell helveticALForum.ch. Sipas autoriteteve të aeroportit, avionët që ndodheshin në afrimin për ulje pas orës 21:00 u detyruan të qëndronin për një kohë në pritje, ndërsa shumë prej tyre u devijuan drejt aeroporteve të Shtutgartit, Gjenevës, Bazelit dhe Lionit. Përveç kësaj, edhe nisjet e fluturimeve u vonuan ndjeshëm, duke krijuar radhë të gjata dhe pritje të zgjatura për pasagjerët.
Gjatë natës u anuluan 44 fluturime, ndërsa deri në orët e mëngjesit të së mërkurës numri i anulimeve arriti në 70. Autoritetet aeroportuale bënë të ditur se mungesa e avionëve dhe ekuipazheve, për shkak të devijimeve të një nate më parë, ndikoi në anulime të tjera edhe ditën pasuese. Shumë pasagjerë e kaluan natën në aeroport. Disa prej tyre u pajisën me komplete për qëndrim gjatë natës, ndërsa sportelet e informacionit, kontrolli i sigurisë dhe ai kufitar qëndruan të hapura më gjatë për të ndihmuar udhëtarët. Megjithatë, përgjegjësia kryesore për asistimin e pasagjerëve u takonte kompanive ajrore. Një pasagjere që udhëtonte me një fluturim nga Heraklioni drejt Cyrihut tregoi se avioni i saj fluturoi për rreth një orë në pritje përpara se të devijohej në Shtutgart. Ajo u shpreh e zhgënjyer nga mungesa e informacionit gjatë fluturimit dhe pas uljes. Sipas saj, shumë udhëtarë, përfshirë familje me fëmijë të vegjël, mbetën të bllokuar në aeroport pa mundësi akomodimi. Për të arritur në destinacion, pasagjerja vendosi të ndajë një taksi me dy persona të tjerë drejt Cyrihut. Udhëtimi kushtoi rreth 550 euro dhe zgjati afërsisht dy orë e gjysmë. Ajo shpreson që shpenzimet t’i rimbursohen nga kompania ajrore.
Edhe një tjetër udhëtare, e cila po fluturonte nga Berlini drejt Cyrihut, përjetoi të njëjtën situatë. Fluturimi i saj u devijua në Shtutgart, ku pasagjerët, sipas saj, mbetën pa udhëzime dhe pa ndihmën e premtuar për akomodim. Në fund, ajo dhe familja e saj u detyruan të paguanin vetë një taksi deri në St. Gallen për t’u kthyer në shtëpi. Ndërkohë, shërbimet e emergjencës në kantonin e Cyrihut raportuan mbi 700 ndërhyrje të zjarrfikësve për shkak të përmbytjeve dhe dëmeve të shkaktuara nga moti i keq, duke e bërë këtë një nga stuhitë më të rënda të muajve të fundit në Zvicër, transmeton 20min.ch, përcjell helveticALForum.ch. (Foto ilustrim)
