Përfshirja në zonën europiane të roaming-ut pritet të sjellë tarifa më të ulëta për thirrjet, mesazhet dhe internetin mobil gjatë udhëtimeve në vendet e Bashkimit Europian. Procesi ka nisur, por përfitimet konkrete do të varen nga kushtet që do të dakordohen dhe zbatimi i marrëveshjes.
Shqipëria ka nisur negociatat për t’u përfshirë në zonën europiane të roaming-ut, një proces që synon të lehtësojë komunikimin telefonik për qytetarët shqiptarë gjatë udhëtimeve në vendet e Bashkimit Europian. Komisioni Europian ka njoftuar hapjen e negociatave me të gjashtë vendet e Ballkanit Perëndimor, pas miratimit në qershor të propozimit përkatës nga Këshilli Europian. Ky zhvillim konsiderohet një hap i rëndësishëm drejt përafrimit të tregut të telekomunikacionit të rajonit me atë europian. Sipas dokumentit të siguruar nga Televizioni Publik Shqiptar (RTSH), negociatat do të përfshijnë një sërë çështjesh juridike, ekonomike dhe teknike, të cilat lidhen drejtpërdrejt me mënyrën se si do të funksionojë sistemi i ri i tarifimit. Në qendër të diskutimeve janë përafrimi me rregullat europiane për çmimet ndërmjet operatorëve, mbrojtja e konsumatorëve, kufijtë e përdorimit të drejtë të shërbimeve, transparenca e tarifave dhe mbikëqyrja e zbatimit të marrëveshjes. Një pjesë e rëndësishme e procesit lidhet edhe me kufizimin e tarifave me shumicë, pra çmimet që operatorët celularë i paguajnë njëri-tjetrit për përdorimin e rrjeteve, si dhe me rregullat për tarifat e përfundimit të thirrjeve.
Ulja e kostove, përfitim për qytetarët
Për qytetarët shqiptarë, përfshirja në zonën europiane të roaming-ut do të nënkuptonte mundësi për të përdorur telefoninë mobile dhe internetin gjatë qëndrimit në vendet e BE-së, me tarifa më të përafërta me ato që paguajnë në vendin e tyre. Aktualisht, një paketë telefonike që përfshin përdorimin në Bashkimin Europian mund të kushtojë rreth 2.900 lekë në muaj për 50 GB internet. Kjo tregon se kostot e komunikimit gjatë udhëtimeve jashtë Shqipërisë mbeten një çështje me rëndësi për konsumatorët. Përfitimet pritet të jenë të ndërsjella. Edhe qytetarët e vendeve europiane që vizitojnë Shqipërinë, veçanërisht turistët, mund të përfitojnë nga tarifat më të favorshme të komunikimit. Kjo merr rëndësi të veçantë në kushtet e rritjes së numrit të vizitorëve të huaj në Shqipëri.
Marrëveshja ende nuk ka një afat përfundimtar
Ndërkohë, operatorët e telekomunikacionit në rajon kanë një marrëveshje vullnetare me operatorët europianë, e cila parashikon çmime orientuese deri në 14 euro për gigabajt gjatë vitit 2026 dhe 9 euro nga viti 2028. Megjithatë, këto tarifa nuk përfaqësojnë ende regjimin e plotë europian të roaming-ut. Një tjetër çështje që mbetet për t’u sqaruar është ndikimi ekonomik i këtij procesi te operatorët shqiptarë, si dhe mënyra se si ndryshimet do të reflektohen në çmimet përfundimtare për konsumatorët. Deri tani nuk është bërë publike një analizë e plotë për këto efekte. Negociatat nuk kanë një afat të përcaktuar për përfundimin. Përfitimi real për qytetarët do të mundësohet vetëm pasi të përmbushen kushtet e kërkuara, të harmonizohen rregullat dhe të realizohet hapja reciproke e tregjeve. Përfshirja e Shqipërisë në zonën europiane të roaming-ut do të ishte një lehtësim i rëndësishëm për mijëra qytetarë që udhëtojnë, punojnë dhe jetojnë në hapësirën europiane, duke përfshirë edhe bashkatdhetarët që mbajnë lidhje të vazhdueshme me familjet e tyre në Shqipëri, transmeton rtsh.
