Në prag të ngjarjes më të madhe muzikore evropiane, Ministri i Turizmit, Kulturës dhe Sportit, Blendi Gonxhja, ka zhvilluar një takim me artistin Alis, i cili do të përfaqësojë Shqipërinë në Eurovision 2026 me këngën e tij të titulluar “Nan”.
Përmes një komunikimi zyrtar në rrjetet sociale, Ministri Gonxhja ndau detaje nga ky takim, duke vlerësuar dimensionin e lartë emocional dhe artistik të projektit përfaqësues. Sipas kreut të dikasterit të Kulturës, versioni i risjellë i këngës “Nan”, i interpretuar nga Alis nën tingujt e pianos, shndërrohet në një rrëfim të ndjerë që depërton te publiku falë thjeshtësisë dhe thellësisë së saj.
Në deklaratën e tij, Gonxhja theksoi rëndësinë e kësaj pjesëmarrjeje, jo vetëm si një garë muzikore, por si një mundësi për të promovuar identitetin dhe shpirtin shqiptar në arenën ndërkombëtare. Ai konfirmoi mbështetjen e institucionit që drejton për këtë rrugëtim. “Ministria e Turizmit, Kulturës dhe Sportit e mbështet këtë rrugëtim përmes @cultur.alb jo vetëm si një përfaqësim artistik, por si një zë që mbart ndjenjën, kulturën dhe shpirtin shqiptar në një skenë ndërkombëtare. I urojmë Alis suksese dhe një përfaqësim sa më dinjitoz në Eurovision 2026 me bindjen se përmes tij, Shqipëria do të dëgjohet me emocion dhe krenari,” deklaron Gonxhja, transmeton rtsh.
