PRISHTINË – Presidentja e Republikës së Kosovës, Justina Shiroka Pula, ka vizituar sot familjet e Hashim Thaçit, Kadri Veselit, Rexhep Selimit dhe Jakup Krasniqit, ish-krerëve të Ushtrisë Çlirimtare të Kosovës, të cilët po përballen me procesin gjyqësor në Dhomat e Specializuara të Kosovës në Hagë. Gjatë takimeve, presidentja shprehu solidaritetin dhe mbështetjen e saj për familjarët, duke theksuar se kjo është një periudhë e vështirë jo vetëm për ta, por edhe për Republikën e Kosovës. Sipas njoftimit të Presidencës, Shiroka Pula ritheksoi se e drejta e apelit është pjesë e procesit gjyqësor dhe se institucionet e Kosovës do të vazhdojnë të mbështesin ish-krerët e UÇK-së në këtë fazë, në përputhje me përgjegjësitë dhe mundësitë institucionale.
Presidentja: Lufta e UÇK-së ishte luftë për liri
Gjatë vizitave, presidentja vuri në pah rëndësinë e mbrojtjes së së vërtetës historike dhe të dinjitetit të atyre që kontribuuan për lirinë e Kosovës.
Ajo theksoi se lufta e Ushtrisë Çlirimtare të Kosovës u zhvillua përballë shtypjes, dhunës dhe krimeve të regjimit të Serbisë ndaj popullit të Kosovës.
Sipas saj, ruajtja e së vërtetës historike dhe respektimi i kontributit të atyre që u angazhuan për lirinë e vendit mbeten çështje me rëndësi për shoqërinë dhe institucionet e Kosovës.
Veprimet për Ligjin për Dhomat e Specializuara
Një tjetër çështje e diskutuar gjatë takimeve ishte Ligji për Dhomat e Specializuara të Kosovës. Presidentja i informoi familjet se do të veprojë lidhur me këtë ligj, duke respektuar afatet ligjore.
Presidenca theksoi se çdo veprim do të ndërmerret brenda kompetencave kushtetuese dhe ligjore të institucionit, në funksion të mbështetjes së përpjekjeve për drejtësi.
Në përfundim të vizitave, Shiroka Pula u përcolli familjeve mesazhin se nuk janë të vetme në këtë rrugëtim dhe se Presidenca do të mbetet e hapur për to.
Vizitat vijnë në një periudhë të rëndësishme për procesin gjyqësor në Hagë, ndërsa mbështetja institucionale dhe respektimi i procedurave ligjore mbeten pjesë e debatit publik në Kosovë lidhur me ish-krerët e UÇK-së dhe zhvillimet e këtij procesi./BS
