Përgatiti Dashnim HEBIBI
Cyrih, 25 tetor 2026 – Në prag të promovimit të librit “Krimet serbe në Kosovë – Rasti i Deçanit”, në Konsullatën e Përgjithshme të Republikës së Kosovës në Cyrih u zhvillua një takim me kryetarin e Komunës së Deçanit, Bashkim Ramosaj, dhe autorin e librit, Adem Lushaj. Takimi u zhvillua një ditë para promovimit të veprës, i cili u mbajt mbrëmjen e së shtunës në Waldkirch të kantonit të St. Gallenit, në prani të bashkatdhetarëve, përfaqësuesve institucionalë dhe veprimtarëve shqiptarë në Zvicër. Pritja në konsullatë u zhvillua në frymën e bashkëpunimit institucional dhe të angazhimit për ruajtjen e kujtesës historike, në një kohë kur dokumentimi i krimeve të luftës në Kosovë mbetet një çështje me rëndësi të veçantë kombëtare. Gjatë këtij takimi, vëmendje e veçantë iu kushtua librit të autorit Adem Lushaj, “Krimet serbe në Kosovë – Rasti i Deçanit”, një vepër që synon të dokumentojë krimet e kryera gjatë luftës në Kosovë, përmes hulumtimeve, dëshmive dhe rrëfimeve të familjeve të prekura nga lufta. Pjesëmarrja e kryetarit të Komunës së Deçanit, Bashkim Ramosaj, dhe autorit Adem Lushaj në këtë takim përbën një mundësi për të theksuar rëndësinë e bashkëpunimit ndërmjet institucioneve të Kosovës dhe përfaqësuesve të mërgatës shqiptare në mbështetje të nismave që ruajnë historinë dhe kujtesën kolektive.
Takimi në konsullatë i parapriu promovimit të librit, i cili u mbajt më 24 tetor, në orën 19:00, në ambientet e Shoqatës Kulturore Shqiptare “Sharri”, në Waldkirch të Zvicrës. Aktiviteti u organizua nën patronatin e Konsullatës së Përgjithshme të Republikës së Kosovës në Cyrih, në bashkëpunim me Lidhjen e Krijuesve Shqiptarë në Mërgatë dhe Shoqatën Kulturore Shqiptare “Sharri”.
Përmes takimeve të tilla dhe veprimtarive kulturore në mërgatë, forcohet lidhja ndërmjet institucioneve të Kosovës, komunave dhe komunitetit shqiptar në Zvicër, duke i dhënë hapësirë promovimit të veprave që dokumentojnë historinë e vendit dhe përvojat e popullit shqiptar gjatë luftës. Dokumentimi i së kaluarës dhe përcjellja e së vërtetës historike te brezat e rinj mbeten përgjegjësi e përbashkët institucionale dhe kombëtare.
