Nga Mehmet ELEZI, publicist, shkrimtar, gjuhëtar dhe diplomat
Ndodh ditën për diell dhe natën për hënë: miliona lekë u grabiten shqiptarëve në Rrugën e Kombit, në tunelin e Kalimashit. Çdo ditë. S’është fjala për tarifën, ajo dihet, është legalizuar. Është fjala për supertarifën e palegalizuar, mbi 40 për qind.
Për kujtesë (megjithëse shifrat e llogaritë financiare nuk hyjnë te profesioni im):
Tarifat standarde për kalimin e tunelit të Kalimashit sipas kategorive të automjeteve në euro dhe në lekë, sipas kursit zyrtar të fundit 1 € = 93.69 lekë, janë:
– Veturë (automjet pasagjerësh, 2 boshte – 4 rrota) – 5 € ose 468 lekë;
– Kamion i vogël, autobus i vogël (2 boshte – 6 rrota) –
11.25€ ose 1,054 lekë;
– Kamion i madh, autobus i madh (3 boshte) – 16.25 € ose 1523 lekë;
– Kamion i rëndë (4 ose më shumë boshte) – 22.50 € ose2108 lekë.
Kështu duhej të ishte, por kështu nuk është.
Kalon me veturë, s’ke 5 euro? Duhet të paguash 660 lekë.
Për 1 euro të marrin 132 lekë, rreth 40 për qind më shumë se kursi zyrtar i këmbimit.
Me kursin e “Bankës” së koncesionarëve për çdo veturë grabiten 200 lekë ose rreth 2.2 euro.
Këtë e pashë vetë, dje, 31 korrik.
Të tjerat dalin me llogari të thjeshtë. Me kursin e “Bankës” së koncesionarëve paguan:
– Për kamion të vogël dhe autobus të vogël: 1485 lekë ose 431 lekë më shumë;
– Për kamion të madh dhe autobus të madh: 2145 lekë ose 622 lekë më shumë;
– Për kamion të rëndë: 2970 lekë ose 862 lekë më shumë!
Gjatë një ditë aty lëvizin mijëra automjete të të gjitha llojeve. Po në një muaj? Po në një vit? Milionat që u grabiten shqiptarëve nuk numrohen.
Asnjë institucion, asnjë medie, nuk bëzan!
