Valle, traditë, muzikë dhe shije shqiptare në zemër të Zvicrës
Më 9 maj 2026, qyteti i Winterthurit do të shndërrohet në një mozaik kulturash, ngjyrash dhe emocionesh në kuadër të festivalit ndërkulturor “INTERKULTURELL – Kulturen stellen sich vor”, njofton helveticALForum.ch ku komunitete të ndryshme nga e gjithë bota do të prezantojnë traditat dhe artin e tyre para publikut zviceran dhe ndërkombëtar. Në këtë ngjarje të rëndësishme kulturore, një vend të veçantë do ta zërë edhe Ansambli “TROJET”, i cili do të përfaqësojë me krenari kulturën shqiptare përmes valleve tradicionale dhe kostumeve kombëtare nga trojet shqiptare.
Në ambientin festiv të Archplatz / Festzentrum në Winterthur, publiku do të ketë mundësinë të përjetojë nga afër bukurinë dhe pasurinë e folklorit shqiptar, përmes interpretimit artistik të Ansamblit “TROJET”, i cili prej vitesh është bërë një urë lidhëse mes brezave dhe kulturës sonë kombëtare në diasporë.
Ky festival do të mbledhë valle dhe tradita nga kultura të ndryshme si ajo shqiptare, greke, zvicerane, boliviane, meksikane, ukrainase dhe shumë të tjera, duke përcjellë një mesazh të fuqishëm bashkëjetese, respekti dhe harmonie ndërkulturore. Brenda këtij mozaiku kulturor, performanca shqiptare pritet të sjellë emocione të veçanta, energji dhe atmosferë festive për të gjithë të pranishmit.
Ansambli “TROJET” do të prezantojë valle tradicionale nga treva të ndryshme shqiptare, të interpretuara me elegancë, disiplinë artistike dhe dashuri për trashëgiminë kombëtare. Kostumet tradicionale shumëngjyrëshe, ritmet folklorike dhe koreografitë autentike do të jenë një dëshmi e gjallë e identitetit dhe kulturës shqiptare, duke tërhequr vëmendjen e publikut vendas dhe ndërkombëtar.
Përveç programit artistik, organizatorët shqiptarë kanë menduar edhe për promovimin e gastronomisë tradicionale shqiptare. Gjatë aktivitetit do të vendoset një tavolinë me ushqime tradicionale, ku vizitorët do të kenë mundësi të shijojnë flinë dhe byrekun e përgatitur me shumë përkushtim nga familjet shqiptare në Zvicër. Kjo pjesë e aktivitetit nuk ka vetëm karakter kulturor, por edhe human e mbështetës, pasi të ardhurat nga shitja do të ndihmojnë në mbulimin e kostove të udhëtimit të Ansamblit “TROJET” për pjesëmarrjen në festivalin folklorik në Detroit, në Shtetet e Bashkuara të Amerikës.
Pjesëmarrja e Ansamblit “TROJET” në këtë festival konsiderohet një tjetër sukses dhe dëshmi e punës së palodhshme për ruajtjen dhe promovimin e kulturës shqiptare në diasporë. Përmes valleve, muzikës dhe traditave tona, ky ansambël vazhdon të mbajë gjallë identitetin kombëtar dhe të forcojë lidhjet mes shqiptarëve kudo që ndodhen.
Organizatorët ftojnë gjithë bashkatdhetarët, miqtë dhe dashamirët e kulturës që të marrin pjesë sa më masivisht në këtë aktivitet, për të mbështetur artistët tanë dhe për të kaluar së bashku një pasdite të mbushur me emocione, traditë dhe krenari shqiptare.
Vendi: Archplatz / Festzentrum, 8400 Winterthur
Data: E shtunë, 09 maj 2026
Fillimi i festës: ora 13:30
Programi artistik: ora 16:00 – 19:00
Ansambli “TROJET” ju mirëpret me zemër të hapur për të festuar së bashku kulturën, traditën dhe frymën shqiptare në një atmosferë ndërkombëtare miqësie dhe bashkëpunimi, njofton sektori për informim i Ansamblit Trojet, përcjell helveticALForum.ch.
