Zyra e Kombeve të Bashkuara në Shqipëri ka shprehur shqetësim për dhunën e fundit dhe rritjen e tensioneve gjatë protestave në Tiranë. Përmes një deklarate zyrtare, OKB-ja u ka bërë thirrje të gjitha palëve të tregojnë përmbajtje, të respektojnë të drejtat e njeriut dhe të angazhohen në dialog konstruktiv.
Zyra e Kombeve të Bashkuara në Shqipëri ka reaguar lidhur me situatën e krijuar gjatë protestave në kryeqytet, duke vënë theksin te rëndësia e garantimit të lirive dhe të drejtave themelore të qytetarëve. Në deklaratën e saj, organizata riafirmon rëndësinë e së drejtës për tubim paqësor, lirisë së shprehjes dhe lirisë së shtypit, duke nënvizuar se siguria dhe dinjiteti i të gjithë personave duhet të mbrohen, në përputhje me parimet e Kartës së Kombeve të Bashkuara dhe kuadrin ndërkombëtar të të drejtave të njeriut.
OKB: Zbatimi i ligjit duhet të jetë proporcional
Një nga pikat kryesore të deklaratës lidhet me mënyrën e ndërhyrjes së autoriteteve gjatë protestave dhe respektimin e standardeve ndërkombëtare. OKB-ja thekson nevojën për përmbajtje dhe proporcionalitet në zbatimin e ligjit, respektimin e procesit të rregullt ligjor dhe garantimin e plotë të të drejtave të njeriut. Në të njëjtën kohë, organizata nënvizon rëndësinë e respektimit të pronës publike dhe private, duke bërë thirrje që gjatë zhvillimeve të protestave të shmangen veprimet që mund të përshkallëzojnë më tej situatën.
Thirrje për ndalimin e dhunës dhe dialog konstruktiv
Në mesazhin e saj, Zyra e Kombeve të Bashkuara në Shqipëri u drejtohet të gjitha palëve të përfshira, duke kërkuar ndalimin e dhunës dhe angazhimin për uljen e tensioneve. Organizata thekson se përballja me situata të tilla kërkon përmbajtje, respekt të ndërsjellë dhe gatishmëri për dialog, në përputhje me parimet e paqes dhe sundimit të ligjit. Reagimi i OKB-së vjen në një moment kur zhvillimet gjatë protestave në Tiranë kanë ngritur shqetësime për sigurinë e qytetarëve, respektimin e të drejtave themelore dhe mënyrën e menaxhimit të tubimeve publike. Përmes kësaj deklarate, Kombet e Bashkuara rikujtojnë rëndësinë e mbrojtjes së lirive demokratike dhe të respektimit të standardeve ndërkombëtare, duke u bërë thirrje të gjitha palëve të kontribuojnë në qetësimin e situatës. /Entela Kumnino, transmetonrtsh.
