Parisi shpreh mbështetje për Dhomat e Specializuara dhe luftën kundër mosndëshkimit, ndërsa rithekson qëndrimin për pavarësinë dhe institucionet e Kosovës.
Franca ka rikonfirmuar mbështetjen e saj për pavarësinë e Kosovës dhe institucionet e saj, pas aktgjykimit të Dhomave të Specializuara në Hagë ndaj katër ish-krerëve të Ushtrisë Çlirimtare të Kosovës. Në një reagim zyrtar, autoritetet franceze theksuan se qëndrimi i Parisit ndaj drejtësisë ndërkombëtare dhe institucioneve të Kosovës mbetet i pandryshuar.
“Franca rithekson mbështetjen e saj për Dhomat e Specializuara të Kosovës dhe rikujton angazhimin e saj në luftën kundër mosndëshkimit”, thuhet në reagim. Në të njëjtën deklaratë, Franca rikonfirmon “mbështetjen e saj të palëkundur për pavarësinë e Kosovës dhe institucionet e saj”.
Deklarata vjen pas vendimit të Dhomave të Specializuara në Hagë për shpalljen fajtorë të Hashim Thaçit, Jakup Krasniqit, Kadri Veselit dhe Rexhep Selimit për vepra të krimeve të luftës. Sipas aktgjykimit, Hashim Thaçi dhe Jakup Krasniqi janë dënuar me nga 25 vjet burgim, ndërsa Kadri Veseli me 18 vjet dhe Rexhep Selimi me 13 vjet burgim.
Vendimi i gjykatës në Hagë ka rikthyer në vëmendje çështjen e përgjegjësisë penale për krimet e kryera gjatë dhe pas luftës në Kosovë, si dhe rolin e Dhomave të Specializuara në trajtimin e këtyre rasteve. Franca, ndërkohë, ka bërë të qartë se mbështetja e saj për institucionet e Kosovës dhe angazhimi për drejtësinë ndërkombëtare mbeten pjesë e qëndrimit zyrtar të Parisit. Qëndrimi francez vjen në një moment të rëndësishëm për Kosovën, duke përcjellë mesazhin se proceset gjyqësore në Hagë dhe mbështetja ndërkombëtare për shtetësinë dhe institucionet e Kosovës trajtohen si çështje të veçanta në politikën zyrtare franceze, transmeton BW.
