Një ngjarje tragjike tronditi të martën në mbrëmje komunën e Kerzers në kantonin e Fribourg, ku një autobus i shërbimit postar zviceran PostAuto Schweiz AG u përfshi nga flakët dhe u shkrumbua plotësisht. Sipas autoriteteve, gjashtë persona kanë humbur jetën dhe pesë të tjerë janë plagosur, disa prej tyre në gjendje kritike. Policia dyshon se zjarri është shkaktuar qëllimisht.
Alarm në mbrëmje dhe reagim i madh i emergjencës
Sipas njoftimit të Kantonspolizei Freiburg, qendra e alarmit dhe emergjencës mori sinjalizimin rreth orës 18:25 për një zjarr në një Postauto në rrugën Murtenstrasse në Kerzers. Kur ekipet e shpëtimit mbërritën në vendngjarje, automjeti ishte tashmë plotësisht në flakë, transmeton 20min.ch. Zjarrfikësit nisën menjëherë operacionet e shuarjes dhe të shpëtimit, ndërsa policia vendosi një perimetër sigurie rreth zonës. Në vendngjarje u angazhua një numër i madh forcash emergjente, përfshirë edhe helikopterë të shpëtimit.
Viktima dhe të plagosur
Autoritetet konfirmuan se gjashtë persona kanë humbur jetën në këtë incident. Identiteti i viktimave nuk është bërë ende publik, pasi procesi i identifikimit është ende në zhvillim. Pesë persona të tjerë kanë mbetur të plagosur. Katër prej tyre ndodheshin brenda autobusit në momentin e zjarrit, ndërsa një tjetër u plagos teksa përpiqej të ndihmonte. Tre nga të plagosurit ndodhen në gjendje kritike dhe janë transportuar me urgjencë në spital.
Dyshime për zjarr të qëllimshëm
Policia konfirmoi se zjarri dyshohet të jetë shkaktuar qëllimisht. Sipas disa dëshmitarëve dhe “news-scouts” që ndodheshin pranë vendit të ngjarjes, një person mund të jetë vetëdjegur brenda autobusit, duke shkaktuar shpërthimin e flakëve. Autoritetet janë në dijeni të kësaj teorie, por nuk kanë dhënë ende detaje shtesë pasi hetimet janë në zhvillim.
Dëshmitë e banorëve
Banorë të zonës raportuan për një kolonë të madhe tymi që ngrihej mbi qytet. Një dëshmitar tha se mbi filialin e një supermarketi aty pranë gjithçka ishte mbuluar nga tymi i zi dhe zona ishte e rrethuar nga forcat e policisë. Pamjet dhe videot e realizuara nga dëshmitarë tregojnë autobusin e djegur plotësisht, ndërsa në vendngjarje shihen edhe persona me djegie në trup.
Probleme në trafik
Sipas informacionit të Touring Club Schweiz, aksidenti dhe ndërhyrja e emergjencës kanë shkaktuar edhe probleme në trafik në rrugën kryesore H22 mes Lyss dhe Murten. Disa korsi janë bllokuar dhe drejtuesit e automjeteve janë paralajmëruar për trafik të dendur dhe rrezik në zonë. Autoritetet kanë hapur gjithashtu një linjë telefonike emergjente për familjarët dhe dëshmitarët në numrin 0800 261 700, ndërsa hetimet për të zbardhur plotësisht shkaqet e tragjedisë vazhdojnë. Në këtë fazë, policia nuk përjashton asnjë pistë dhe pritet që informacionet e reja të bëhen publike në ditët në vijim, transmeton 20min.ch, përcjell helveticALForum.ch
