Zvicra hyn në një fazë të re rregullash nga 1 korriku 2025, me ndryshime që prekin jetën e përditshme të qytetarëve në disa fusha kyçe. Nga asgjësimi më i thjeshtë i pakove me mallra të falsifikuara, te masa më të rrepta për të miturit që kryejnë krime të rënda, e deri te risitë në trafikun rrugor dhe kujdesin shëndetësor – këto janë ndryshimet që duhen njohur.
Pakot me mallra të falsifikuara: Më pak burokraci, më shumë efikasitet
Duke filluar nga 1 korriku, dogana zvicerane do të ketë më shumë kompetenca për të shkatërruar pako me mallra të falsifikuara nga jashtë vendit – sidomos ato me origjinë nga platformat online si Temu apo Shein.
Nëse një pako përmban maksimumi tre artikuj dhe nuk kalon peshen prej 5 kilogramësh, dogana do të njoftojë vetëm blerësin, jo më edhe mbajtësin e të drejtës së markës.
Kjo do të përshpejtojë procesin dhe do të lehtësojë punën në rastet e vogla, duke shmangur procedurat ligjore të panevojshme. Vendimi është pjesë e një përpjekjeje për të mbrojtur konsumatorët dhe tregun vendas nga falsifikimet.
Krime të rënda nga të miturit: Ligji i ri për rastet ekstreme
Në sistemin penal për të miturit bëhet një ndryshim i rëndësishëm: Personat që kanë kryer vrasje mes moshës 16 dhe 18 vjeç, mund të përballen me masa të përhershme sigurie (verwahrung) pas mbushjes së moshës madhore.
Kjo masë ekstreme mund të zbatohet vetëm nëse ekziston rrezik real i përsëritjes së veprës. Sipas statistikave, nga viti 2010 deri më 2020 janë regjistruar 12 raste të tilla – pra bëhet fjalë për masa që prekin raste të rralla, por me rëndësi të madhe për sigurinë publike.
Zgjerim i kontrollit për kancerin e zorrës së trashë
Një tjetër ndryshim pozitiv vjen në fushën e shëndetësisë: kontrolli për zbulimin e hershëm të kancerit të zorrës së trashë do të rimbursohet nga sigurimi shëndetësor bazë deri në moshën 74 vjeç.
Deri tani, ky mbulim përfundonte në moshën 69 vjeç, edhe pse statistikat tregojnë se pothuajse gjysma e rasteve të diagnostikuara ndodhin pas të 70-tave.
Përmes këtij vendimi, autoritetet shpresojnë të rrisin zbulimin dhe trajtimin e hershëm të kësaj forme të kancerit, që shpesh mund të parandalohet me ndërhyrje në kohë.
Provimi për patentë shoferi: Fokus te teknologjia dhe siguria
Nga 1 korriku, të gjithë kandidatët për marrjen e lejes së drejtimit të mjetit do të testohen edhe për përdorimin e sistemeve ndihmëse të drejtimit, si:
- Tempomati (kontrolli automatik i shpejtësisë)
- Asistenca për ndërrimin e korsisë
- Sistemi i mbajtjes në korsi
Qëllimi është që shoferët e rinj të jenë të aftë të përdorin në mënyrë të sigurt këto teknologji moderne dhe të njohin kufizimet e tyre. Ndryshimi reflekton përparimin e teknologjisë në automjete dhe nevojën për edukim praktik në përdorimin e tyre.
Rregulla të reja për E-Bike dhe mjete elektrike të rënda
Në fushën e transportit, hyjnë në fuqi disa ndryshime të rëndësishme për biçikletat elektrike dhe mjetet e lehta me motor:
- Krijohet një kategori e re mjetesh të quajtur “motorfahrräder elektrike të rënda”, me peshë deri në 450 kg.
- Këto mjete më parë futeshin në kategorinë e motoçikletave të vogla, por tani do të kenë rregulla të posaçme dhe shenja sinjalistike të veçanta.
- Shenjat rrugore për “biçikletë” dhe “motorfahrrad” do të përfshijnë edhe nënkategori të reja:
- Shenja “biçikletë” do të vlejë për biçikleta klasike, E-Bike të ngadalta dhe trotineta elektrike me shpejtësi deri në 20 km/h.
- Shenja “motorfahrrad” do të përdoret për E-Bike të shpejta, mopedë me benzinë dhe mjetet e reja elektrike të rënda.Këto ndryshime janë pjesë e përpjekjeve të Zvicrës për të qenë në hap me zhvillimet teknologjike, për të garantuar sigurinë e qytetarëve dhe për të lehtësuar jetën e përditshme përmes një administrate më efikase, transmeton 20min.ch.
SAM24.info