/ Nga: Dashnim HEBIBI/ SAM24.info
Bern, 06 prill
Në ambientet e Ambasadës së Republikës së Maqedonisë së Veriut në Konfederatën Zvicerane, është zhvilluar një takim i rëndësishëm diplomatik ndërmjet Ambasadorit të Maqedonisë së Veriut në Bern, Shkëlqesia e Tij z. Rexhep Demiri, dhe Ambasadores së Republikës së Turqisë në Zvicër, znj. Şebnem İncesu.
Gjatë takimit miqësor dhe njëherazi pune, u riafirmuan marrëdhëniet tradicionale dhe të shkëlqyera ndërmjet dy vendeve. Të dyja palët shprehën përkushtimin për thellimin e mëtejshëm të bashkëpunimit në fusha me interes të përbashkët, si dhe për vazhdimin e dialogut konstruktiv në nivel bilateral dhe ndërkombëtar.
Ambasadori Demiri vlerësoi lart marrëdhëniet miqësore mes Republikës së Maqedonisë së Veriut dhe Republikës së Turqisë, duke theksuar rolin aktiv të dy diplomacive në ndërtimin e urave të bashkëpunimit për paqe dhe stabilitet rajonal.
Ky takim është pjesë e një kalendari të dendur aktivitetesh diplomatike të Ambasadës në Bern, ku Ambasadori Demiri, me përkushtim të vazhdueshëm, angazhohet në thellimin e lidhjeve me shtetin pritës, Zvicrën, si dhe me vendet mike të Republikës së Maqedonisë së Veriut.
Edhe gjatë fundjavave, përpjekjet diplomatike nuk ndalen, duke reflektuar seriozitetin dhe përgjegjësinë institucionale që përfaqëson ambasada në raport me interesat e qytetarëve dhe shtetit.
Takimi u vlerësua si i frytshëm dhe do të pasohet me hapa konkretë në drejtim të bashkëpunimit të mëtejshëm ndërmjet dy vendeve.