Presidenti i Zvicrës, Guy Parmelin, ka rikonfirmuar qëndrimin e vendit të tij për të mos tërhequr trupat nga Kosova, duke nënvizuar se kontributi zviceran në misionet paqeruajtëse do të mbetet i pandryshuar në vitet e ardhshme. Në një intervistë për Blick.ch, ai theksoi se aktualisht 215 ushtarë zviceranë janë të angazhuar në kuadër të misionit Swisscoy, pjesë e forcës ndërkombëtare KFOR. Sipas Parmelin, mandati i këtij misioni është i vlefshëm deri më 31 dhjetor 2026, ndërsa Këshilli Federal i Zvicrës ka paraqitur tashmë kërkesë që prania e Swisscoy të vazhdojë deri në vitin 2029. “Parlamenti pritet të marrë një vendim së shpejti, por qëndrimi ynë është i qartë: KFOR-i mbetet një element kyç për sigurinë dhe stabilitetin në rajon”, deklaroi ai. Duke folur për marrëdhëniet ndërmjet Kosova dhe Serbia, presidenti zviceran theksoi se dialogu mbetet rruga e vetme drejt normalizimit. Ai pranoi se Zvicra luan një rol të rëndësishëm në këtë proces, duke ofruar një platformë joformale për ndërmjetësim mes dy vendeve.
“Qëndrimi ynë afatgjatë është se progresi vjen përmes dialogut, normalizimit dhe hapave konkretë që ndikojnë drejtpërdrejt në jetën e qytetarëve”, u shpreh Parmelin. Ai shtoi se vendi i tij mbështet fuqishëm procesin e ndërmjetësuar nga Bashkimi Evropian, duke kontribuar paralelisht me iniciativa që nxisin komunikimin dhe besimin mes palëve.
Në analizën e tij për situatën më të gjerë në Ballkanin Perëndimor, Parmelin vlerësoi zhvillimet ekonomike të arritura gjatë dy dekadave të fundit, por paralajmëroi se stabiliteti mbetet i brishtë dhe kërkon përkushtim të vazhdueshëm politik. Ai theksoi nevojën për qasje të matur dhe bashkëpunim rajonal, sidomos në një kohë të karakterizuar nga sfida globale dhe tensione gjeopolitike.
Në përfundim, ai ritheksoi se stabiliteti i rajonit dhe integrimi evropian mbeten ndër prioritetet kryesore të politikës së jashtme zvicerane, duke e vendosur Zvicrën si një aktor të rëndësishëm në ruajtjen e paqes dhe nxitjen e dialogut në Ballkan, transmeton Bsot.
