Përgatiti Dashnim HEBIBI
Zürich, 26 shtator 2026 – Shefi i Konsullatës së Përgjithshme të Kosovës në Zürich, Vigan Berisha, ka marrë pjesë në manifestimin jubilar me rastin e 10-vjetorit të themelimit të Shoqatës Humanitare Tuhini Zvicër. Sipas një postimi të tij, Berisha ishte i pranishëm në këtë ngjarje me ftesë të shoqatës, duke e cilësuar mbrëmjen si një aktivitet të veçantë kushtuar humanizmit, traditës, kulturës dhe ruajtjes së lidhjeve me vendlindjen. Në këtë përvjetor jubilar u vlerësua puna dhe angazhimi i shoqatës gjatë një dekade, veçanërisht në aspektin e solidaritetit dhe kontributit në komunitet.
Berisha ka përgëzuar kryesinë e Shoqatës Humanitare Tuhini Zvicër, si dhe të gjithë bashkëvendësit për punën e bërë gjatë këtyre dhjetë viteve.
“Sot me ftesë të Shoqatës Humanitare Tuhini Zvicër, kishim kënaqësinë të merrnim pjesë në manifestimin jubilar me rastin e 10-vjetorit të themelimit të Shoqatës. Një mbrëmje e veçantë kushtuar humanizmit, traditës, kulturës dhe ruajtjes së lidhjeve me vendlindjen”, ka shkruar Berisha.
Ai ka vlerësuar veçanërisht angazhimin e komunitetit shqiptar në Zvicër për ruajtjen e lidhjeve me vendlindjen dhe për kontributin në iniciativa humanitare e kulturore. Në mesazhin e tij, Berisha ka uruar shoqatën për përvjetorin, duke shprehur dëshirën që aktiviteti i saj të vazhdojë edhe në vitet e ardhshme.
“Përgëzime kryesisë dhe të gjithë bashkëvendësve për një dekadë angazhimi, solidariteti dhe kontributi. Urime 10-vjetori, Shoqata Humanitare Tuhini Zvicër! Edhe shumë vite të tjera në shërbim të komunitetit dhe vendlindjes.”
Përvjetorët e shoqatave të mërgatës shqiptare në Zvicër mbeten një mundësi për të bashkuar komunitetin, për të ruajtur traditat dhe për të forcuar lidhjet ndërmjet brezave dhe vendlindjes, transmeton helveticALforum.ch.
