TIRANË – Kryeministri i Shqipërisë, Edi Rama, pritet t’u drejtohet qytetarëve me një mesazh të posaçëm pas përfundimit të vizitës së tij në Shtetet e Bashkuara. Sipas njoftimit për mediat, Rama do të flasë nga salla e shtypit në Aeroportin Ndërkombëtar “Nënë Tereza”, menjëherë pas mbërritjes së tij në Shqipëri.
Megjithatë, ende nuk është përcaktuar ora e saktë e kthimit të kryeministrit. Nisja nga aeroporti JFK në Nju Jork mbetet e pakonfirmuar për shkak të kushteve të pafavorshme atmosferike. Sipas njoftimit zyrtar, detajet për orarin e adresimit të kryeministrit pritet të bëhen të ditura gjatë paradites së ditës së nesërme.
Fjala e Ramës vjen në një situatë të zhvillimeve të vazhdueshme politike në vend. Në Tiranë vijojnë protestat kundër qeverisë, ndërsa protestuesit kanë artikuluar edhe kërkesa për dorëheqjen e kryeministrit. Në këto rrethana, adresimi i Ramës pritet të jetë në fokus të vëmendjes publike, ndërsa mbetet për t’u parë se cilat do të jenë mesazhet që ai do të përcjellë pas vizitës së tij në Shtetet e Bashkuara. Orari i saktë i fjalimit do të publikohet gjatë paradites, sipas njoftimit për mediat./BW
