Krakow, Poloni – 7 shtator 2026
Një delegacion i Universitetit “Haxhi Zeka” po merr pjesë në trajnimin për trajnerë që po zhvillohet në Krakow të Polonisë, në kuadër të projektit evropian “MetaTech 4.0”. Projekti financohet nga Bashkimi Evropian përmes programit Erasmus Plus, ndërsa UHZ është njëri nga partnerët e projektit.
Delegacioni i UHZ-së përbëhet nga Prof.ass.dr.Driton Sylqa, Xhemajli Kastrati, drejtor i shkollës së mesme teknike “Rifat Gjota”, Fidan Rizvanolli, drejtor i prodhimit në kompaninë industriale Kontura, Jahja Lataj, këshilltar i Rektorit, dhe Ernest Beqiri, pjesëmarrës në aktivitetet trajnuese në fushën e CAD/CAM, të organizuara në kuadër të projektit MetaTech 4.0.
Aktiviteti në Krakow përfaqëson vizitën e dytë ndërkombëtare studimore të organizuar në kuadër të projektit, pas vizitës së zhvilluar në Podgoricë. Kjo vizitë studimore ofron mundësi për forcimin e njohurive dhe kompetencave praktike të pjesëmarrësve, si dhe për shkëmbimin e përvojave dhe praktikave të mira në fushat e Industrisë 4.0, dixhitalizimit, automatizimit dhe proceseve moderne të prodhimit.
Një nga objektivat kryesore të projektit MetaTech 4.0 është forcimi i bashkëpunimit ndërmjet institucioneve të arsimit dhe aftësimit profesional, institucioneve të arsimit të lartë dhe sektorit industrial, si dhe zhvillimi i aftësive digjitale dhe teknike të nevojshme për tregun e punës në zhvillim. Projekti synon gjithashtu të rrisë cilësinë dhe relevancën e arsimit dhe trajnimit profesional dhe të mbështesë kalimin drejt mjediseve industriale më inovative dhe teknologjikisht të avancuara në Ballkanin Perëndimor. Pjesëmarrja e përfaqësuesve nga UHZ, arsimi profesional dhe industria e thekson qasjen ndërsektoriale të projektit dhe rëndësinë e lidhjes së arsimit dhe trajnimit me nevojat reale të sektorit industrial. Përmes pjesëmarrjes aktive në MetaTech, UHZ vazhdon të forcojë bashkëpunimin ndërkombëtar, të promovojë inovacionin dhe transformimin digjital dhe të kontribuojë në zhvillimin e aftësive dhe kompetencave për Industrinë 4.0, duke fuqizuar më tej lidhjet ndërmjet arsimit, aftësimit profesional dhe industrisë, transmeton UHZ, përcjell helveticALforum.ch.
