Kryetari i Prishtinës diskuton për dialogun, kohezionin shoqëror dhe bashkëpunimin mes Lindjes dhe Perëndimit
Kryetari i Prishtinës, Përparim Rama, ka marrë pjesë në Kongresin e 30-të Ndërkombëtar Renovabis, i cili është mbajtur në Freising të Gjermanisë. Në qendër të diskutimeve të këtij takimi kanë qenë kohezioni shoqëror, dialogu dhe forcimi i bashkëpunimit ndërmjet Lindjes dhe Perëndimit.
Rama ka qenë pjesë e panelit përmbyllës të kongresit, ku ka diskutuar së bashku me Kardinalin Dr. Mario Grech, Anahit Mkhoyan dhe Dr. Volker Ullrich. Diskutimet janë përqendruar në rëndësinë e dialogut, përgjegjësisë dhe besimit si elemente që mund të kontribuojnë në afrimin e njerëzve dhe tejkalimin e dallimeve shoqërore.
Sipas njoftimit të Komunës së Prishtinës, kryetari Rama e ka prezantuar kryeqytetin si një qytet të karakterizuar nga diversiteti dhe ndërveprimi mes komuniteteve të ndryshme.
“Prishtina është qytet i diversitetit, por mbi të gjitha i energjisë që lind kur dallimet takohen”, thuhet në njoftimin e Komunës së Prishtinës.
Gjatë forumit, Rama ka theksuar gjithashtu rëndësinë e përfshirjes dhe të krijimit të një shoqërie ku qytetarët ndihen të dëgjuar dhe pjesë e proceseve shoqërore.
“Shoqëritë më të forta ndërtohen kur secili ndihet i dëgjuar, i përfshirë dhe pjesë e së njëjtës të ardhme”, citohet të ketë thënë Rama.
Kongresi i Renovabis në Freising mblodhi përfaqësues dhe pjesëmarrës nga vende të ndryshme për të diskutuar sfidat e kohezionit shoqëror, dialogut dhe bashkëpunimit në Evropë. Pjesëmarrja e kryetarit të Prishtinës në panelin përmbyllës e vendosi përvojën e kryeqytetit të Kosovës në kuadër të diskutimeve më të gjera për bashkëjetesën dhe afrimin mes shoqërive evropiane, transmeton rtk.
