Nga Dashnim Hebibi
Grupe shqiptarësh nga Zvicra pritet të udhëtojnë drejt Hagës, ku është planifikuar shpallja e aktgjykimit ndaj Hashim Thaçit, Kadri Veselit, Jakup Krasniqit dhe Rexhep Selimit. Organizime për udhëtim janë bërë nga shoqata të ndryshme shqiptare në Zvicër. Sipas informacioneve të publikuara nga organizatorët, grupet e para pritet të nisen rreth orës 18:00. Udhëtimi nga Cyrihu deri në Hagë zgjat rreth nëntë orë, në varësi të trafikut dhe mënyrës së transportit. Pjesëmarrësit pritet të udhëtojnë me vetura dhe mjete të tjera transporti. Ata synojnë të jenë të pranishëm pranë selisë së Dhomave të Specializuara të Kosovës gjatë ditës së shpalljes së vendimit.
“Dua të jem atje”
Arbeni, me prejardhje nga rrethina e Gjilanit, është njëri prej personave që pritet të udhëtojë nga Cyrihu drejt Hagës.
“Janë rreth nëntë orë rrugë nga Cyrihu deri në Hagë, por mezi pres të nisem. Dua të jem atje dhe shpresoj që të dalin të drejtë. Për mua lufta e UÇK-së ishte e drejtë, sepse ne nuk shkuam të luftonim në Serbi. Ne luftuam në tokën tonë, për lirinë tonë”, tha ai.
Procesi gjyqësor në Hagë
Hashim Thaçi, Kadri Veseli, Jakup Krasniqi dhe Rexhep Selimi po gjykohen nga Dhomat e Specializuara të Kosovës për akuza që lidhen me krime lufte dhe krime kundër njerëzimit. Të akuzuarit i kanë mohuar akuzat. Dhomat e Specializuara të Kosovës janë themeluar me bazë në ligjin e miratuar nga Kuvendi i Kosovës dhe veprojnë në Hagë. Gjykata është kompetente për çështje që lidhen me pretendimet për krime të kryera gjatë dhe pas luftës në Kosovë. Shpallja e aktgjykimit do të zhvillohet në kuadër të procedurave të gjykatës. Vendimi i gjykatës do të përcaktojë përgjegjësinë penale të të akuzuarve në bazë të provave dhe standardeve të zbatueshme ligjore.
Pjesëmarrja e mërgimtarëve
Mërgimtarë nga Zvicra dhe vende të tjera evropiane kanë njoftuar se do të udhëtojnë drejt Hagës për të ndjekur zhvillimet pranë gjykatës. Në mesin e tyre pritet të ketë persona me prejardhje nga Kosova, Maqedonia e Veriut, Lugina e Preshevës, Mali i Zi dhe treva të tjera shqiptare. Pjesëmarrja e tyre është e lidhur me interesin për procesin gjyqësor dhe me mbështetjen personale që duan t’u shprehin të akuzuarve dhe familjeve të tyre. Nuk ka të dhëna të sakta publike për numrin e personave që pritet të udhëtojnë nga Zvicra. Organizatorët dhe pjesëmarrësit duhet të respektojnë rregullat e sigurisë dhe udhëzimet e autoriteteve lokale gjatë qëndrimit në Hagë.
Pritja për vendimin
Shpallja e aktgjykimit pritet të ndiqet me interes nga familjet e të akuzuarve, ish-bashkëluftëtarët, institucionet e Kosovës dhe publiku në Kosovë e në diasporë. Për familjet, mbështetësit e të akuzuarve dhe kombin tonë, vendimi përfaqëson një moment të rëndësishëm pas një procesi gjyqësor që ka zgjatur disa vjet. Për gjykatën, aktgjykimi do të bazohet në vlerësimin e provave dhe në interpretimin e ligjit. Mërgimtarët që do të udhëtojnë nga Zvicra pritet të qëndrojnë në Hagë gjatë seancës dhe të ndjekin zhvillimet në përputhje me rregullat e përcaktuara nga autoritetet.
