Kryeministri i Kosovës, Albin Kurti, ka udhëtuar drejt New York-ut, ku do të marrë pjesë në Javën e Nivelit të Lartë të Sesionit të 81-të të Asamblesë së Përgjithshme të Kombeve të Bashkuara.
Gjatë qëndrimit në Shtetet e Bashkuara të Amerikës, Kurti pritet të zhvillojë një sërë takimesh bilaterale me liderë dhe përfaqësues të vendeve të ndryshme, në kuadër të aktiviteteve të Asamblesë së Përgjithshme të OKB-së.
Sipas njoftimit të Zyrës së Kryeministrit të Kosovës, takimet do të kenë në fokus promovimin dhe forcimin e vlerave dhe interesave kryesore shtetërore të Republikës së Kosovës në arenën ndërkombëtare.
Vizita në New York do të shfrytëzohet gjithashtu për takime me komunitetin shqiptar në SHBA. Kurti pritet të takohet me pjesëtarë të diasporës dhe përfaqësues të shoqatave shqiptare, me të cilët do të diskutojë çështje me interes për komunitetin dhe Kosovën.
Në agjendën e tij janë përfshirë edhe takime me investitorë potencialë të interesuar për ekonominë e Kosovës. Sipas Zyrës së Kryeministrit, këto takime synojnë promovimin e mundësive ekonomike dhe tërheqjen e investimeve në vend.
“Gjatë qëndrimit në Amerikë, kryeministri Kurti gjithashtu do të takojë pjesëtarë të komunitetit shqiptar në SHBA, përfaqësues të shoqatave të diasporës dhe investitorë potencialë në ekonominë e Kosovës”, thuhet në njoftimin zyrtar.
Asambleja e Përgjithshme e Kombeve të Bashkuara zhvillon aktivitetet kryesore gjatë muajit shtator, ndërsa Java e Nivelit të Lartë dhe debati i përgjithshëm mbledhin në New York liderë nga vende të ndryshme të botës.
Pjesëmarrja e Kosovës në këtë kuadër përbën një mundësi për takime diplomatike dhe diskutime dypalëshe, ndërsa delegacioni kosovar pritet të fokusohet në forcimin e marrëdhënieve ndërkombëtare dhe promovimin e interesave të vendit, transmeton rtsh.
