Deputeti shqiptar në Kuvendin e Serbisë, Shaip Kamberi, ka zhvilluar një takim në New York me kongresistin amerikan Joe Wilson, ku në fokus ishte gjendja e shqiptarëve në Luginën e Preshevës.
Deputeti shqiptar në Kuvendin e Serbisë, Shaip Kamberi, ka zhvilluar në New York një takim me kongresistin amerikan Joe Wilson, me të cilin ka diskutuar për çështjet që prekin komunitetin shqiptar në Luginën e Preshevës.
Sipas Kamberit, gjatë takimit janë ngritur disa nga shqetësimet kryesore të shqiptarëve në Preshevë, Medvegjë dhe Bujanoc. Ndër temat e diskutuara ishin përfaqësimi i shqiptarëve në institucionet publike, pasivizimi i adresave të banimit, arsimi në gjuhën shqipe dhe mosnjohja e diplomave të Kosovës nga institucionet e Serbisë.
Kamberi ka bërë të ditur se gjatë bisedës është theksuar nevoja që këto çështje të marrin më shumë vëmendje ndërkombëtare dhe të trajtohen edhe në kuadër të Komisionit të Helsinkit të Shteteve të Bashkuara.
Po ashtu, sipas deputetit shqiptar, këto tema duhet të jenë pjesë e komunikimeve dhe diskutimeve me autoritetet në Beograd.
“Lugina e Preshevës duhet të jetë pjesë e vëmendjes ndërkombëtare”, ka shkruar Kamberi pas takimit.
Takimi në New York vjen në kuadër të angazhimeve të Kamberit për të ngritur në arenën ndërkombëtare çështjet që lidhen me pozitën e shqiptarëve në Luginën e Preshevës. Ai ka kërkuar në vazhdimësi që çështjet e përfaqësimit institucional, arsimit, dokumentacionit dhe të drejtave të komunitetit shqiptar të trajtohen në dialogun me institucionet e Serbisë dhe me partnerët ndërkombëtarë.
