Shqipëria po shënon përparim të rëndësishëm në rrugën drejt anëtarësimit në Bashkimin Evropian. Përfaqësuesja e Lartë e BE-së për Politikën e Jashtme dhe të Sigurisë, Kaja Kallas, e ka renditur vendin tonë mes katër shteteve që kanë bërë hapat më të rëndësishëm në procesin e negociatave, së bashku me Malin e Zi, Moldavinë dhe Ukrainën.
Gjatë prezantimit të raportit vjetor të zgjerimit të Bashkimit Evropian për vitin 2026, Kallas vlerësoi ritmin e Shqipërisë në procesin e integrimit, duke theksuar se hapja e të gjithë grupkapitujve të negociatave brenda pak më shumë se një viti përbën një arritje të rëndësishme.
“Shqipëria ka hapur të gjithë grupkapitujt e negociatave në pak më shumë se një vit. Detyra tani është të ruajë këtë ritëm duke përshpejtuar reformat”, deklaroi Kallas, raporton ATSH. Një tjetër zhvillim i rëndësishëm lidhet me hartimin e udhërrëfyesve të posaçëm nga Komisioni Evropian për Shqipërinë dhe tre vendet e tjera që po avancojnë në procesin e anëtarësimit. Këto dokumente përcaktojnë objektivat dhe hapat konkretë që duhet të ndërmerren gjatë vitit të ardhshëm, me synimin për të përshpejtuar negociatat dhe përmbushjen e kritereve evropiane.
Sipas vlerësimit të Komisionit Evropian, Shqipëria ka përmbushur kriteret e ndërmjetme në kapitujt që lidhen me shtetin e së drejtës. Ky progres krijon mundësinë për mbylljen paraprake të katër kapitujve të negociatave, duke shënuar një tjetër hap të rëndësishëm drejt anëtarësimit.
Ndërkohë, qeveria shqiptare ka vendosur si objektiv përfundimin e negociatave deri në fund të vitit 2027. Një synim ambicioz, por që sipas vlerësimit të Komisionit Evropian mund të jetë i realizueshëm, nëse vendi ruan ritmin e reformave, përmbush detyrimet e kërkuara dhe forcon dialogun politik.
Gjatë fjalës së saj, Kallas u ndal edhe te rëndësia strategjike e zgjerimit të Bashkimit Evropian, duke theksuar se ky proces nuk duhet parë thjesht si zgjerim territorial i Unionit, por si një investim i drejtpërdrejtë në sigurinë dhe fuqinë gjeopolitike të Evropës.
“Kur vendet që përparojnë lihen në pritje, paqëndrueshmëria zë rrënjë. Zgjerimi është një investim i drejtpërdrejtë në sigurinë e Evropës”, theksoi ajo.
Vlerësimi i Kallas përbën një sinjal pozitiv për perspektivën evropiane të Shqipërisë, por njëkohësisht vendos në fokus përgjegjësinë për të vijuar me zbatimin e reformave dhe përmbushjen e standardeve të kërkuara nga Brukseli.
Rruga drejt anëtarësimit mbetet e lidhur ngushtë me rezultatet konkrete në forcimin e shtetit të së drejtës, funksionimin e institucioneve demokratike dhe konsolidimin e dialogut politik. Për Shqipërinë, sfida e radhës nuk është vetëm të ruajë ritmin e negociatave, por të shndërrojë progresin e arritur në rezultate të qëndrueshme në rrugën drejt familjes evropiane, transmeton rtk.
