Zvicër – Pagesat me telefon po bëhen gjithnjë e më të përhapura në Zvicër, por paralelisht po rriten edhe shqetësimet për një të ardhme ku karta fizike bankare mund të zhduket nga portofoli. Partia “Integriteti Digjital Zvicër” paralajmëron se pagesat nuk duhet të varen vetëm nga telefoni celular transmeton 20min.ch. Bashkëkryetarja e partisë, Nicole Rüegger, argumenton se karta fizike duhet të mbetet një mundësi edhe në të ardhmen, pasi jo të gjithë qytetarët kanë smartphone ose janë në gjendje të përdorin lehtësisht shërbimet digjitale.
28 për qind preferojnë pagesat me telefon
Sipas të dhënave të Visa Payment Monitor 2026, 28 për qind e qytetarëve zviceranë preferojnë të paguajnë me telefon. Bankat po vërejnë gjithashtu një rritje të vazhdueshme të kërkesës për karta digjitale. Zürcher Kantonalbank (ZKB) u mundëson klientëve që prej vitit 2022 të ruajnë kartën e debitit në telefon. Edhe Berner Kantonalbank (BEKB) dhe UBS kanë konstatuar rritje të përdorimit të pagesave përmes telefonit. ZKB po e promovon këtë mënyrë pagese edhe përmes një fushate ku klientët që aktivizojnë kartën e debitit Visa në një portofol digjital deri në fund të gushtit mund të fitojnë një nga rreth 100 kuponët, me vlerë totale prej 25 mijë frangash.
“E drejta për një jetë offline”
Sipas Rüegger, problemi lind në momentin kur telefoni nuk është më thjesht një mundësi, por bëhet kusht për të kryer pagesa. Ajo paralajmëron gjithashtu për rrezikun e krijimit të varësisë nga kompanitë e mëdha teknologjike dhe për mundësinë që personat pa smartphone, veçanërisht të moshuarit ose njerëzit që kanë vështirësi me teknologjinë, të përjashtohen nga jeta e përditshme ekonomike. Partia kërkon për këtë arsye një “të drejtë për një jetë offline”, duke argumentuar se qytetarët duhet të kenë gjithmonë mundësi të paguajnë edhe pa telefon.
Karta fizike ende dominon në Zvicër
Megjithëse pagesat digjitale po rriten, karta tradicionale nuk është ende pranë zhdukjes në Zvicër. Sipas anketës më të fundit të Bankës Kombëtare Zvicerane, karta e debitit vazhdon të jetë mënyra më e përdorur e pagesës në përditshmëri. Pra, ndërsa telefoni po fiton gjithnjë e më shumë hapësirë në portofolin digjital të zviceranëve, karta fizike mbetet ende një pjesë e rëndësishme e sistemit të pagesave. Debati tani është nëse digjitalizimi duhet të zëvendësojë plotësisht mënyrat tradicionale të pagesës apo nëse të dyja format duhet të bashkëjetojnë edhe në të ardhmen, transmeton 20min.ch, përcjell helveticALforum.ch.
