Ferit Hoxha zhvillon takim në Bukuresht me ministrin rumun Alexandru-Mihai Ghigiu. Në fokus, procesi i anëtarësimit të Shqipërisë në Bashkimin Evropian, forcimi i institucioneve dhe shkëmbimi i përvojave në qeverisjen vendore.
Procesi i integrimit evropian të Shqipërisë dhe forcimi i bashkëpunimit dypalësh kanë qenë në qendër të takimit të zhvilluar në Bukuresht mes ministrit për Evropën dhe Punët e Jashtme, Ferit Hoxha, dhe ministrit rumun të Investimeve dhe Projekteve Evropiane, Alexandru-Mihai Ghigiu. Takimi u zhvillua në kuadër të vizitës zyrtare të ministrit Hoxha në Rumani, ku palët diskutuan mbi sfidat dhe përgjegjësitë që shoqërojnë procesin e anëtarësimit të Shqipërisë në Bashkimin Evropian. Sipas njoftimit të Ministrisë për Evropën dhe Punët e Jashtme, një vëmendje e veçantë iu kushtua nevojës për forcimin e kapaciteteve institucionale dhe administrative, me qëllim përgatitjen e strukturave shtetërore për përmbushjen e detyrimeve që rrjedhin nga anëtarësimi në BE.
Një tjetër çështje e diskutuar ishte zgjerimi i bashkëpunimit mes autoriteteve vendore të të dy vendeve. Në këtë kuadër, u vlerësua përvoja e Rumanisë në përafrimin e qeverisjes vendore me legjislacionin dhe standardet e Bashkimit Evropian, si një mundësi për shkëmbimin e praktikave dhe ekspertizës.
Gjatë bisedës u trajtua gjithashtu përdorimi i instrumenteve të politikës së kohezionit të Bashkimit Evropian, të cilat luajnë një rol të rëndësishëm në mbështetjen e zhvillimit rajonal dhe vendor.
Bashkëpunimi me Rumaninë në këto fusha shihet si një mundësi për të përfituar nga përvoja e një vendi anëtar të BE-së, veçanërisht në administrimin e fondeve evropiane dhe përgatitjen e institucioneve për standardet komunitare. Takimi në Bukuresht vjen në një moment të rëndësishëm për procesin e integrimit evropian të Shqipërisë, ndërsa forcimi i administratës publike, përmirësimi i qeverisjes vendore dhe përdorimi efektiv i fondeve evropiane mbeten ndër çështjet kryesore të këtij procesi, transmeton rtsh.
