Përgatiti Dashnim HEBIBI
Bernë, 04 nëntor 2026 – Shefi i Konsullatës së Republikës së Kosovës në Cyrih, z. Vigan Berisha, së bashku me kolegët e korit konsullor në Cyrih, zhvilloi një vizitë të veçantë në Parlamentin Federal të Zvicrës, në Bernë, ku patën mundësinë të njihen nga afër me traditën parlamentare, historinë dhe funksionimin e institucioneve federale zvicerane. Gjatë kësaj vizite, delegacioni pati rastin të takojë personalitete të ndryshme të politikës dhe institucioneve zvicerane, duke e vlerësuar këtë takim si një mundësi të rëndësishme për njohje, bashkëpunim dhe forcim të marrëdhënieve ndërmjet përfaqësuesve diplomatikë dhe institucioneve të shtetit helvetik. Me këtë rast, z. Vigan Berisha shprehu mirënjohjen e tij të thellë për Zvicrën dhe popullin e saj, duke theksuar lidhjen e veçantë që shqiptarët kanë ndërtuar ndër dekada me këtë shtet mik. Për shqiptarët në përgjithësi, Zvicra nuk është vetëm një vend ku kanë gjetur mundësi për jetë dhe punë, por është shndërruar në një atdhe të dytë. Sot, në këtë shtet jetojnë dhe veprojnë disa gjenerata të mërgatës shqiptare, deri te gjenerata e katërt, të cilat janë integruar në shoqërinë zvicerane, duke ruajtur njëkohësisht gjuhën, kulturën dhe identitetin e tyre kombëtar.
Një jetë në Zvicër – kjo është shprehja që dëgjohet shpesh nga shumë bashkatdhetarë, të cilët në këtë vend kanë ndërtuar familjet, karrierën dhe të ardhmen e tyre.
Z. Berisha, duke vlerësuar marrëdhëniet e veçanta ndërmjet Kosovës dhe Zvicrës, theksoi se populli shqiptar nuk do t’i harrojë kurrë ditët kur shteti zviceran ishte pranë Kosovës, veçanërisht në periudhat më të vështira të historisë së saj. Mbështetja zvicerane për Kosovën ka lënë gjurmë të pashlyeshme në kujtesën kolektive të qytetarëve dhe të mërgatës shqiptare. Ai nënvizoi se çdo bashkatdhetar që jeton në Zvicër ndien një lidhje të veçantë me këtë vend dhe është mirënjohës për mundësitë, përkrahjen dhe mikpritjen e treguar ndër vite. Në këtë frymë, edhe institucionet e Republikës së Kosovës shprehin falënderimin dhe respektin e tyre të përhershëm për Zvicrën dhe popullin e saj, të cilët kanë dëshmuar miqësi dhe solidaritet të vazhdueshëm ndaj Kosovës dhe kombit shqiptar në përgjithësi. Vizita në Parlamentin Federal të Zvicrës përbën një tjetër dëshmi të marrëdhënieve të mira dhe lidhjeve të forta ndërmjet dy vendeve, të cilat mbështeten në respektin e ndërsjellë, miqësinë historike dhe kontributin e rëndësishëm të diasporës shqiptare në shoqërinë zvicerane.
Zhvillim i ri: Takim i paralajmëruar me Presidentin e Zvicrës
Ndërkohë, sipas burimeve të portalit HelveticALforum.ch, bëhet e ditur se z. Vigan Berisha, sot në orën 16:00, pritet të zhvillojë një takim me Presidentin e Zvicrës, Shkëlqesinë e Tij, z.Guy Parmelin. Për më shumë detaje rreth këtij takimi dhe rëndësisë së tij, do t’ju informojmë në vijim, sapo të kemi informacione të tjera.
Zvicra mbetet një nga miqtë më të çmuar të Kosovës, ndërsa mirënjohja e shqiptarëve për këtë shtet dhe popullin e tij është një lidhje që përcillet brez pas brezi. /HelveticALforum.ch
