Rritja e vazhdueshme e primeve të sigurimeve shëndetësore po rëndon gjithnjë e më shumë buxhetin e familjeve në Zvicër. Një sondazh i ri tregon se 68 për qind e popullsisë mbështesin krijimin e një arke të vetme kombëtare, megjithëse ideja vazhdon të kundërshtohet nga partitë e djathta dhe një pjesë e politikës zvicerane, transmeton 20min.ch. Rritja e primeve të sigurimeve shëndetësore mbetet një nga shqetësimet kryesore të qytetarëve në Zvicër. Sipas një sondazhi të realizuar nga instituti Leewas, me porosi të mediave 20 Minuten dhe Tamedia, më shumë se gjysma e të anketuarve e konsiderojnë rritjen e primeve si një barrë të rëndë financiare. Ndërsa 9 për qind deklarojnë se kanë vështirësi të mëdha për t’i paguar ato. Situata duket veçanërisht shqetësuese te të rinjtë. Pothuajse një në dhjetë persona të moshës 18 deri në 34 vjeç thotë se nuk e di se si do të mund t’i përballojë pagesat e sigurimit shëndetësor.
68 për qind kërkojnë një arkë të vetme
Në këtë situatë, ideja e krijimit të një arke të vetme kombëtare të sigurimeve shëndetësore po fiton gjithnjë e më shumë mbështetje. Sipas sondazhit, 68 për qind e qytetarëve janë në favor të këtij modeli, i cili do të zëvendësonte sistemin aktual me shumë kompani sigurimesh shëndetësore. Mbështetja është e dukshme në të gjitha grupmoshat, te gratë dhe burrat, si dhe te simpatizantët e partive të ndryshme politike. Edhe te personat me të ardhura të larta, ku përkrahja është disi më e ulët, shumica vazhdon të mbështesë këtë propozim.
Të majtët e mbështesin, të djathtët e kundërshtojnë
Partitë e majta, veçanërisht Partia Socialdemokrate (SP) dhe të Gjelbrit, janë ndër mbështetëset kryesore të krijimit të një arke të vetme.
Përfaqësuesja e të Gjelbërve, Manuela Weichelt, argumenton se bashkimi i 37 arkave aktuale në një institucion të vetëm do të mundësonte uljen e kostove administrative, shpenzimeve për reklama dhe pagave të larta të drejtuesve të kompanive të sigurimeve.
Në anën tjetër, deputeti i SVP-së, Thomas de Courten, e kundërshton fuqishëm këtë ide. Sipas tij, një arkë shtetërore do të rrezikonte cilësinë e shërbimeve, zgjedhjen e lirë të siguruesit dhe konkurrencën në sistemin shëndetësor.
Edhe përfaqësuesi i Partisë së Qendrës, Lorenz Hess, shpreh rezerva. Ai thekson se problemi kryesor nuk lidhet vetëm me administrimin e sigurimeve, por me rritjen e vazhdueshme të shërbimeve mjekësore që kërkohen nga popullsia. Sipas tij, krijimi i një arke të vetme nuk do ta zgjidhte këtë problem.
SP paralajmëron iniciativë popullore
Deputetja e SP-së, Sarah Wyss, konfirmon mbështetjen e saj për krijimin e një arke të vetme kombëtare. Ajo bën të ditur se baza e partisë ka vendosur të përgatisë një iniciativë popullore për këtë çështje, e cila pritet të ndërmerret gjatë vitit 2026.
Ndërkohë, SP po shqyrton edhe një propozim tjetër: vendosjen e primeve në varësi të të ardhurave të qytetarëve, në mënyrë që personat me të ardhura më të ulëta të mos përballen me të njëjtën barrë financiare si ata me të ardhura më të larta.
Një debat që rikthehet në politikën zvicerane
Ideja e krijimit të një arke të vetme kombëtare nuk është e re. Ajo është paraqitur edhe më parë në Zvicër, por është refuzuar tri herë në referendumet popullore. Megjithatë, rritja e vazhdueshme e kostove të sigurimeve shëndetësore duket se po e rikthen këtë çështje në qendër të debatit politik. Rezultatet e sondazhit tregojnë një pakënaqësi të konsiderueshme të popullsisë me sistemin aktual. Por mbetet për t’u parë nëse mbështetja prej 68 për qind në sondazh do të përkthehet edhe në vota në rast të një referendumi të ri.
Një gjë është e qartë: për shumë familje në Zvicër, primet e sigurimeve shëndetësore janë kthyer në një barrë gjithnjë e më të vështirë për t’u përballuar, transmeton 20min.ch, përcjell helveticALforum.ch
