Prishtinë – Basketbolli i Kosovës po shënon një tjetër arritje të rëndësishme në arenën ndërkombëtare. Jeta Zeka, gjyqtare nga Peja, është bërë gruaja e parë nga Kosova e nominuar për të gjykuar ndeshje në garat evropiane të klubeve të FIBA-s. Zeka është nominuar për dy ndeshje të FIBA EuroCup Women 2026/27, duke shkruar një faqe të re për basketbollin kosovar dhe për përfaqësimin e gjyqtareve kosovare në arenën ndërkombëtare. Paraqitjen e parë në këtë garë ajo do ta ketë më 14 tetor në Itali, në përballjen ndërmjet Magnolia Basket Campobasso dhe Cinkarna Celje.
Vetëm një javë më vonë, më 21 tetor, Zeka do të jetë pjesë e ekipit të gjyqtarëve edhe në ndeshjen GEAS Basket – Panathinaikos A.C., e cila do të zhvillohet në Milano. Nominationet për këto dy ndeshje përbëjnë një moment të veçantë për Jeta Zekën, por edhe për basketbollin kosovar, duke dëshmuar rritjen e përfshirjes së profesionistëve nga Kosova në garat ndërkombëtare. Arritja e saj vjen si rezultat i punës dhe përkushtimit në gjykim, ndërsa paraqitjet në EuroCup Women përfaqësojnë një hap të rëndësishëm në karrierën e saj ndërkombëtare. Me këto dy ndeshje, emri i Jeta Zekës pritet të bëhet pjesë e historisë së basketbollit kosovar, si gjyqtarja e parë femër nga Kosova që merr përgjegjësinë për të ndarë drejtësinë në garat evropiane të klubeve të FIBA-s. Një tjetër derë evropiane hapet për basketbollin kosovar – këtë herë përmes bilbilit të një gjyqtareje nga Peja./BS
