Cardiff – Dueli i shumëpritur mes dy yjeve të boksit britanik, Anthony Joshua dhe Tyson Fury, pritet të zhvillohet në orët e para të mëngjesit të së shtunës, më 12 dhjetor, në stadiumin “Principality” të Cardiffit. Sipas kërkesës së paraqitur pranë Këshillit të Cardiffit për zgjatjen e orarit të funksionimit të stadiumit, hyrja e dy boksierëve në ring është planifikuar rreth orës 01:00, pas një performance të shkurtër muzikore live.
Për shkak të orarit të pazakontë, organizatorët kanë kërkuar një leje të veçantë për zgjatjen e aktiviteteve në stadium. “Millennium Stadium plc” ka kërkuar që orari i lejuar për zhvillimin e eventit të shtyhet deri në orët e para të mëngjesit, duke e cilësuar këtë si një rast të vetëm dhe të kufizuar.
Kërkesa përfshin gjithashtu zgjatjen e orarit për muzikën live dhe atë të regjistruar, shërbimet e ushqimit dhe pijeve, si dhe shitjen e alkoolit deri në orën 03:00. Stadiumi pritet të qëndrojë i hapur deri në orën 03:30.
Orari i planifikuar lidhet edhe me tregun amerikan, pasi zhvillimi i duelit në orët e para të mëngjesit sipas kohës lokale në Uells do të mundësonte transmetimin e tij në një orar më të përshtatshëm për audiencën në Shtetet e Bashkuara.
Organizatorët kanë bërë të ditur se çatia e “Principality Stadium” do të qëndrojë e mbyllur gjatë gjithë eventit, ndërsa janë parashikuar masa të shtuara për sigurinë dhe menaxhimin e turmës.
Një zëdhënës i Këshillit të Cardiffit ka konfirmuar se kërkesa për ndryshimin e licencës lidhet me duelin e propozuar mes Joshua dhe Fury, duke përfshirë edhe performancën muzikore që do t’i paraprijë hyrjes së boksierëve në ring.
Kreu i Këshillit të Cardiffit, Chris Weaver, ka deklaruar më herët se përballja mund të sjellë përfitime të konsiderueshme ekonomike për qytetin dhe të tërheqë vizitorë nga e gjithë Mbretëria e Bashkuar dhe më gjerë.
Dueli mes Joshua dhe Fury është paralajmëruar si një nga përballjet më të mëdha të boksit britanik. Interesi për sfidën është rritur ndjeshëm që prej njoftimit të saj, ndërsa organizatorët dhe partnerët e eventit kanë shqyrtuar edhe mundësinë që përballja të zhvillohej në Shtetet e Bashkuara, përfshirë “Madison Square Garden” në Nju Jork.
Tashmë, Cardiffi dhe “Principality Stadium” janë në qendër të vëmendjes, ndërsa tifozët presin momentin kur dy kampionët britanikë do të ngjiten në ring për një nga duelet më të shumëpritura të peshave të rënda./BS
