Sipërmarrësit gjermanë zhvilluan një program 11-ditor me takime në OKB, Shtëpinë e Bardhë, Kongresin amerikan, botën e biznesit dhe institucionet diplomatike
Në kuadër të një prej periudhave më intensive të takimeve dhe aktiviteteve ndërkombëtare që shoqërojnë Sesionin e 81-të të Asamblesë së Përgjithshme të Kombeve të Bashkuara në New York, një delegacion prej 28 sipërmarrësish gjermanë zhvilloi një program të gjerë takimesh dhe shkëmbimesh në Shtetet e Bashkuara të Amerikës. Delegacioni u iniciua dhe u drejtua nga sipërmarrësit gjermanë Sarna Röser dhe Michael Schröder, të cilët kanë ndërtuar një format të veçantë të diplomacisë ekonomike, duke lidhur sipërmarrësit me vendimmarrës politikë, institucione ndërkombëtare dhe aktorë të rëndësishëm të ekonomisë globale. Përgjatë 11 ditëve, delegacioni zhvilloi takime në New York, Washington, D.C. dhe Virginia, duke përfshirë angazhime në kuadër të Kombeve të Bashkuara, kontakte me përfaqësues të Shtëpisë së Bardhë dhe Kongresit amerikan, misione diplomatike, struktura të ushtrisë amerikane, si dhe takime me përfaqësues të rëndësishëm të biznesit dhe politikës.
Fatmir Hysenbelliu pjesë e takimit në Axel Springer
Një prej momenteve të rëndësishme të këtij programi ishte takimi i zhvilluar në zyrat e Axel Springer SE në Shtetet e Bashkuara. Në këtë takim mori pjesë edhe Zv. Presidenti i Hysenbelliu Group, Fatmir Hysenbelliu, i cili ishte pjesë e këtij shkëmbimi me sipërmarrës dhe përfaqësues të rëndësishëm të biznesit gjerman dhe ndërkombëtar. Axel Springer SE është një prej grupeve më të mëdha evropiane të medias dhe teknologjisë, me seli në Berlin. Grupi ka ndërtuar një portofol të fuqishëm markash ndërkombëtare në fushën e medias, gazetarisë, teknologjisë dhe platformave digjitale, ndër të cilat BILD, DIE WELT, POLITICO dhe Business Insider, si dhe platforma të rëndësishme në fushën e punësimit dhe shpalljeve, përfshirë Stepstone Group dhe AVIV Group. Takimi në ambientet e Axel Springer u shndërrua në një tjetër mundësi për shkëmbim pikëpamjesh mbi zhvillimet ekonomike, politike dhe mediatike, si dhe mbi sfidat dhe mundësitë që sjell bashkëpunimi ndërkombëtar.
Sarna Röser, një zë i rëndësishëm i Mittelstand-it gjerman
Në qendër të këtij formati ndërkombëtar qëndron Sarna Röser, një prej përfaqësueseve të njohura të sipërmarrjes gjermane dhe të sektorit të ndërmarrjeve të vogla dhe të mesme, të njohur si Mittelstand. Röser është sipërmarrëse, anëtare e bordeve mbikëqyrëse dhe përfaqësuese e interesave të biznesit gjerman në Berlin. Ajo përfaqëson gjeneratën e katërt të Grupit Röser, një biznes familjar me një histori 104-vjeçare, aktiv në industrinë e betonit dhe çimentos. Rreth dy vite më parë, Röser bashkëthemeloi iniciativën “Unternehmer in Bewegung” (UiB), së bashku me figura të njohura të sipërmarrjes gjermane. Që prej krijimit, iniciativa është zgjeruar në një rrjet prej rreth 3,000 sipërmarrësish.
Synimi i UiB është të krijojë ura të reja bashkëpunimi mes drejtuesve të biznesit gjerman, vendimmarrësve politikë, institucioneve ndërkombëtare dhe aktorëve të rëndësishëm ekonomikë. Röser është gjithashtu pjesë e disa strukturave të rëndësishme të ekonomisë gjermane. Ajo është anëtare e Bordit Mbikëqyrës të Fielmann Group, një prej kompanive më të mëdha të optikës në Evropë, si dhe Zëvendëskryetare e Bordit Mbikëqyrës të flatexDEGIRO AG, kompani e listuar në indeksin MDAX. Gjithashtu, ajo mban postin e Zëvendëskryetares së Fondacionit Ludwig Erhard, krahas angazhimeve të tjera në borde dhe institucione këshilluese.
Michael Schröder dhe lidhjet ekonomike ndërkombëtare
Bashkë me Röser, një rol të rëndësishëm në organizimin dhe zhvillimin e këtyre delegacioneve luan edhe Michael Schröder, sipërmarrës, investitor dhe iniciator i delegacioneve ndërkombëtare të biznesit. Schröder ka një përvojë të gjerë në zhvillimin ndërkombëtar të biznesit dhe marrëdhëniet ekonomike, veçanërisht në raportet mes Gjermanisë dhe Evropës Juglindore. Ai dhe Röser kanë konceptuar delegacione që synojnë të shkojnë përtej formatit tradicional të një udhëtimi biznesi. Objektivi është krijimi i kontakteve të drejtpërdrejta dhe shkëmbimeve konkrete mes sipërmarrësve, institucioneve, vendimmarrësve politikë dhe kompanive lider në tregjet ndërkombëtare.
“Machen statt meckern”: Nga ankesa te veprimi
Në thelb të kësaj nisme qëndron një mesazh i qartë: “Machen statt meckern” – “Bëj, mos u anko”. Është një filozofi që synon të nxisë më shumë përgjegjësi, guxim dhe veprim konkret nga komuniteti i biznesit dhe shoqëria në përgjithësi. Për organizatorët, fuqizimi i sipërmarrjes nuk duhet të kufizohet vetëm në periudha zgjedhore apo në cikle të shkurtra politike. Përkundrazi, synimi është krijimi i një rrjeti afatgjatë që përfshin breza të ndryshëm sipërmarrësish, kompani të përmasave të ndryshme dhe drejtues të rinj e me përvojë. Në këtë kuadër, delegacioni i zhvilluar në Shtetet e Bashkuara përfaqëson një model të diplomacisë ekonomike që ndërthur biznesin, politikën, median dhe marrëdhëniet ndërkombëtare.
Pjesëmarrja e Fatmir Hysenbelliut në takimin e zhvilluar në ambientet e Axel Springer SE i shtohet këtij rrjeti kontaktesh dhe shkëmbimesh ndërkombëtare, duke krijuar hapësira të reja për dialog dhe bashkëpunim mes sipërmarrësve shqiptarë, gjermanë dhe amerikanë. Në një kohë kur ekonomia globale po përballet me ndryshime të shpejta dhe sfida të reja, nisma të tilla synojnë të krijojnë jo vetëm lidhje biznesi, por edhe një vizion më afatgjatë për bashkëpunimin ekonomik ndërkombëtar./BW
