Washington/Prishtinë – Kapiteni i Policisë së Kosovës, Visar Shala, ka përfunduar me sukses Sesionin e 299-të të Akademisë Kombëtare të FBI-së (FBI National Academy), në Shtetet e Bashkuara të Amerikës.
Ceremonia e diplomimit u zhvillua në Quantico të Virxhinias, në prani të zyrtarëve të institucioneve të zbatimit të ligjit nga Shtetet e Bashkuara dhe vende të ndryshme të botës.
Sipas njoftimit të Ambasadës së Republikës së Kosovës në SHBA, në Sesionin e 299-të të Akademisë Kombëtare të FBI-së morën pjesë gjithsej 265 zyrtarë të zbatimit të ligjit nga Shtetet e Bashkuara, si dhe përfaqësues nga 29 vende të tjera.
Pjesëmarrja e kapitenit Visar Shala në këtë program ndërkombëtar të trajnimit përfaqëson një hap të rëndësishëm në zhvillimin profesional të kuadrove të Policisë së Kosovës, si dhe në forcimin e bashkëpunimit me institucionet ndërkombëtare të zbatimit të ligjit.
“Diplomimi i kapitenit Shala përbën një arritje të rëndësishme profesionale dhe dëshmon angazhimin e Policisë së Kosovës për zhvillimin e kuadrove të saj dhe forcimin e bashkëpunimit ndërkombëtar në fushën e zbatimit të ligjit”, thuhet në njoftimin e Ambasadës së Kosovës në SHBA.
Akademia Kombëtare e FBI-së në Quantico mbledh zyrtarë të lartë të zbatimit të ligjit nga SHBA-ja dhe vende të ndryshme të botës, duke ofruar programe të avancuara profesionale dhe mundësi për shkëmbim të përvojave ndërmjet institucioneve të sigurisë.
Përfundimi me sukses i këtij programi nga kapiteni Shala shënon një tjetër përvojë ndërkombëtare për Policinë e Kosovës dhe kontribuon në thellimin e lidhjeve profesionale me partnerët ndërkombëtarë në fushën e sigurisë dhe zbatimit të ligjit./BS
