Budapest – Xhudistja kosovare Laura Fazliu ka përfunduar në vendin e pestë në Grand Slamin e Hungarisë, një prej turneve më prestigjiozë të kalendarit ndërkombëtar të xhudos.
Fazliu garoi në kategorinë deri në 63 kilogramë, ku arriti deri në fazat e avancuara të turneut, duke siguruar një tjetër rezultat të rëndësishëm në garën për pikët olimpike drejt Lojërave Olimpike Los Anxhelos 2028.
Për vendin e pestë në Budapest, xhudistja kosovare ka fituar 360 pikë olimpike, të cilat pritet të kenë rëndësi në rrugëtimin e saj drejt kualifikimit për Olimpiadën e ardhshme.
Paraqitje të mirë në këtë Grand Slam ka pasur edhe Dardan Cena, i cili regjistroi dy fitore në kategorinë e tij, para se të ndalej në raundin e tretë të garës.
Ndërkohë, Kosovës i ka munguar një prej emrave kryesorë të ekipit, Distria Krasniqi. Medalistja e dyfishtë olimpike nuk mori pjesë në Grand Slamin e Hungarisë për shkak të një lëndimi.
Rezultati i Fazliut në Hungari vjen në kuadër të përgatitjeve dhe garave të rëndësishme që do të përcaktojnë renditjen olimpike në prag të Los Anxhelos 2028, transmeton rtk.
