Debati për çmimet e larta të qirave vazhdon të jetë një nga temat më të diskutuara në Zvicër, sidomos në qytetet e mëdha ku gjetja e një banese të përballueshme është bërë gjithnjë e më e vështirë. Megjithatë, një analizë e re evropiane tregon se situata në disa vende të tjera të Evropës është edhe më problematike dhe se qytetet zvicerane, falë pagave të larta, renditen relativisht mirë krahasuar me shumë metropole të kontinentit, transmeton 20minch. Sipas një studimi të publikuar nga portali financiar dhe i lajmeve Tradingpedia.com, i bazuar në të dhënat e platformës ndërkombëtare Numbeo, qytetarët në disa vende evropiane shpenzojnë pothuajse të gjithë pagën mujore vetëm për qiranë e një apartamenti të vogël në qendër të qytetit.
Në Zvicër, megjithëse qiratë janë ndër më të shtrenjtat në Evropë, raporti mes të ardhurave dhe kostos së banimit mbetet më i favorshëm sesa në shumë qytete të tjera evropiane. Sipas analizës, në Bazel, Bernë dhe Lozanë, qiraja mesatare për një apartament me një dhomë në qendër të qytetit përbën rreth 25 deri në 26 për qind të pagës mesatare neto mujore. Në Cyrih kjo përqindje arrin në rreth 35 për qind, ndërsa në Gjenevë në 37.5 për qind.
Cyrihu rezulton të ketë qiratë më të larta absolute nga të gjitha 127 qytetet e analizuara në Evropë. Një apartament mesatar me një dhomë në qendër të qytetit kushton mbi 2370 franga zvicerane në muaj. Megjithatë, paga mesatare neto në qytet tejkalon 6780 franga, çka do të thotë se banorëve u mbeten ende afro 65 për qind e të ardhurave pas pagesës së qirasë.
Ndryshe paraqitet situata në disa qytete të Evropës Jugore, ku qiratë janë më të ulëta në vlerë absolute, por shumë më të rënda krahasuar me pagat. Rasti më ekstrem sipas raportit është Lisbona në Portugali, e cilësuar si simbol i krizës së strehimit të përballueshëm në Evropë. Në Lisbonë, qiraja mesatare mujore për një apartament me një dhomë në qendër të qytetit arrin në rreth 1331 euro, ndërsa paga mesatare neto mujore është vetëm pak më e lartë, rreth 1342 euro. Kjo nënkupton se një qiramarrës i ri duhet të shpenzojë mbi 99 për qind të të ardhurave mujore vetëm për strehim. Ekspertët sqarojnë se këto statistika krahasojnë kryesisht qiratë e reja me pagat aktuale mesatare. Shumë banorë që jetojnë prej kohësh në të njëjtat banesa paguajnë qira dukshëm më të ulëta. Megjithatë, të dhënat tregojnë qartë vështirësitë me të cilat përballen qytetarët që kërkojnë sot një banesë të re në treg.
Edhe qytetet nordike si Kopenhaga, Oslo dhe Bergeni kanë qira relativisht të larta, por falë nivelit të lartë të pagave, banorët arrijnë të përballojnë më lehtë kostot e jetesës sesa në shumë qytete të Evropës Jugore. Në Zvicër, presioni mbi tregun e banesave mbetet i madh, sidomos në qytetet universitare dhe qendrat ekonomike ku kërkesa për apartamente vazhdon të rritet. Megjithatë, krahasimi evropian tregon se fuqia blerëse e pagave zvicerane vazhdon të jetë një faktor kyç që ndihmon banorët të përballojnë kostot e larta të qirasë më mirë se pjesa më e madhe e Evropës, transmeton20min.ch, përcjell helveticALForum.ch.
