Presidenti amerikan Donald Trump ka njoftuar se Shtetet e Bashkuara do të ndërmarrin një operacion të ri për të ndihmuar lirimin e qindra anijeve të bllokuara në Gjirin Persik, mes tensioneve të vazhdueshme me Iranin.
Në një deklaratë publike, Trump bëri të ditur se operacioni, i quajtur “Projekti Liri”, synon të sigurojë kalimin e sigurt të anijeve përmes Ngushtica e Hormuzit, një nga rrugët më të rëndësishme për tregtinë globale të energjisë. Ai e cilësoi nismën si një përpjekje humanitare “në emër të Shteteve të Bashkuara dhe partnerëve ndërkombëtarë”.
Sipas të dhënave, mbi 850 anije dhe rreth 20 mijë marinarë mbeten të bllokuar në rajon si pasojë e bllokadës së vendosur nga Irani pas përshkallëzimit të konfliktit me SHBA-në dhe Izraelin në fund të shkurtit.Megjithatë, detajet e operacionit mbeten të kufizuara. Wall Street Journal raportoi se plani aktual nuk parashikon shoqërimin e anijeve nga marina amerikane, por një koordinim të trafikut detar mes aktorëve të industrisë së transportit.
Ndërkohë, Komanda Qendrore e SHBA ka bërë të ditur se operacioni mund të mbështetet nga kapacitete të konsiderueshme ushtarake, përfshirë anije me raketa të drejtuara, avionë dhe mijëra trupa.
Reagimi nga Teherani ka qenë i menjëhershëm. Një zyrtar i lartë iranian paralajmëroi se çdo ndërhyrje amerikane në ngushticë do të konsiderohej shkelje e armëpushimit ekzistues dhe mund të sjellë pasoja të mëtejshme.
Zhvillimet vijnë në një moment delikat diplomatik. Trump deklaroi se përfaqësuesit e tij po zhvillojnë “diskutime shumë pozitive” me Iranin, ndërsa më herët kishte shprehur skepticizëm për një marrëveshje të shpejtë. Ndërmjetësimi i Pakistanit deri më tani nuk ka prodhuar rezultate konkrete.
Bllokimi i Ngushticës së Hormuzit ka ndikuar drejtpërdrejt në tregjet globale, me çmimet e naftës që kanë kaluar 120 dollarë për fuçi, duke rritur shqetësimet për një krizë ekonomike ndërkombëtare, transmeton rtsh.
