Bernë, 31 mars 2026 – Në kuadër të përmirësimit të shërbimeve për diasporën shqiptare, Ambasada e Republikës së Shqipërisë në Bernë ka ndërmarrë një nismë të re me fokus të veçantë tek qytetarët në nevojë. Ky institucion po shqyrton mundësinë e vendosjes së një shërbimi të posaçëm konsullor, i cili synon t’u vijë në ndihmë shtetasve shqiptarë që e kanë të pamundur të udhëtojnë drejt Shqipërisë apo të paraqiten fizikisht në ambientet e ambasadës.
Kjo nismë synon të lehtësojë aksesin në dokumente bazë identifikimi për kategori të veçanta qytetarësh, përfshirë ata me probleme shëndetësore apo kushte të tjera që kufizojnë lëvizjen e tyre. Në këtë kuadër, ambasada planifikon të ofrojë shërbime si pajisja me pasaportë biometrike dhe kartë identiteti (ID), duke sjellë administratën më pranë qytetarëve.
Për të përfituar nga ky shërbim, të interesuarit duhet të paraqesin një kërkesë përmes adresës elektronike zyrtare të ambasadës. Bashkë me kërkesën, kërkohet edhe dokumentacioni përkatës, i cili përfshin një kopje të dokumenteve aktuale identifikuese, një vërtetim mjekësor që dëshmon pamundësinë për lëvizje, adresën e plotë të vendbanimit si dhe një numër telefoni funksional. Kjo iniciativë përbën një hap të rëndësishëm drejt një shërbimi më gjithëpërfshirës dhe human, duke reflektuar përkushtimin e institucioneve shqiptare për të mos lënë asnjë qytetar pas, pavarësisht rrethanave të tyre. Autoritetet u bëjnë thirrje të gjithë qytetarëve që ndodhen në këto kushte, apo familjarëve të tyre, të mos hezitojnë të kontaktojnë dhe të përfitojnë nga kjo mundësi që synon të lehtësojë jetën e tyre në përditshmëri, transmeton helveticALForum.ch
