Nga Dashnim HEBIBI
Në Pejë, aty ku në mesnatë dritat e qytetit ndalen, ekziston një vend ku drita nuk shuhet kurrë. Është Shtëpia Botuese “Libri Im”, një shtypshkronjë modeste në pamje, por e madhe në mision. Një poç drite i ndezur simbolikisht dhe realisht vazhdon të punojë çdo ditë, falë përkushtimit të Berat Thaqit dhe familjes së tij, të cilët pa zhurmë dhe pa u ndalur, i shërbejnë librit shqip.
Në këtë hapësirë ku fjala e shkruar respektohet dhe ruhet me dinjitet, sapo ka dalë nga shtypi libri më i ri i autorit Isa B. Mjeku, me titullin “ECI NËPËR KOHË POEZIE – GEHT DURCH DIE ZEIT”. Ky botim përfaqëson jo vetëm një vepër të re letrare, por edhe një dëshmi se poezia vazhdon të ecë përmes kohës, gjuhëve dhe ndjeshmërive njerëzore.
Shtëpia Botuese “Libri Im” vazhdon të mbetet një strehë për autorët dhe një mburojë për librin, duke dëshmuar se kultura nuk matet me madhësinë e ndërtesave, por me përkushtimin e njerëzve që e mbajnë gjallë. Në një kohë sfidash për botimin dhe leximin, ky institucion i vogël në dukje mban një rol të madh në ruajtjen dhe zhvillimin e fjalës së shkruar.
Autorit Isa B. Mjeku i urojmë suksese me këtë botim dhe presim me interes libra të tjerë që do të dalin nga kjo vatër e palodhur e librit. Sepse aty ku ka dritë për librin, ka shpresë për kulturën dhe të ardhmen. / HelveticALforum.ch
