Nga Kemajl Milaim Goca, Prishtinë
Ambasadori kroat befasoi të gjithë
Legjenda e karatesë botërore, Enver Idrizi, si gjithmonë në zemër e ka Kosovën dhe shqiptarinë.
Modestia e tij e bën edhe më të dashur për opinionin.
Si gjithmonë i qetë, pedant dhe frymëzues për brezat e rinj.
Në vitet e 90-ta, shpërtheu si vullkan, karateist i papërmbajtshëm për rivalët, lartësoi shtetin kroat, shqiptarët dhe nuk e fshehu kurrë prejardhjen e tij, duke folur me krenari e me lot në sy.
“Unë jam nga Kosova, babai im nga Prelezi i Ferizajt, nëna nga Peja”, kështu ka thënë Idrizi në vitet e 90-ta.
Ambasadori kroat në Maqedoni, ishte i mahnitur nga suksesi i madh i Enver Idrizit, në kohën kur Republika e Kroacisë ishte në luftë me pushtuesin serb.
“Unë jam ambasador i vogël i shtetit tim, por Enver Idrizi është ambasador i madh i Kroacisë”, kështu kishte thënë në vitet e 90-ta ambasadori kroat, Cvitkov.
Mbreti i karatesë botërore, ish halë në sy për regjimin e Beogradit.
Beogradi nuk e duronte dot suksesin e Enver Idrizit, për faktin se po e përfaqësonte Kroacinë që kishte president shteti Franjo Tugjmanin.
Suksesi i tij dhe thesari i medaljeve 10.1 kilogramë, ishin histori që nuk përshkruhen dhe që çmendi botën sportive!
Askush nuk mund të imagjinonte se një shqiptar trupgjatë e nga Kosova po mrekullon në fanellën e Kroacisë, në fanellën e armikut të Serbisë, ndërsa Kosova ishte e okupuar dhe e shtypur nga makineria e pushtuesit serb.
“Gjatë gjithë kohës në Frankfurt gëzoja përkrahje e zëshme të publikut shqiptar.
Pas kampionatit ata deri në mëngjes, së bashku me mua, kremtuan titullin e kampionit botëror.
Mbi 200 vetura me flamuj shqiptarë parakaluan nëpër rrugët e Frankfurtit. Për shkak të kremtimit të zhurmshëm kolonën e ndali edhe policia gjermane.
Me të mësuar shkasin, nuk e bënë të madhe”, – rrëfente me krenari Idrizi në vitin 1995 për të përdyjavshmen sportive “Top Sport” me gazetarin Njazi Ejupi.
Edhe sot kroatët betohen në kokën e Enver Idrizit.
Sportist i madh!
Një emër që shkroi historinë kroate, sikurse ylli i futbollit Kujtim Shala, i pari shqiptar që veshi fanellën e kombëtare së Kroacisë, sikurse Ardian Kozniku, ylli nga Kosova, shënuesi i parë më i mirë në Kampionatin e parë kroat dhe fituesi i medaljes së bronztë në Kampionatin Botëror me kroatët e selektorit Çiro Bllazheviqit.
