St. Gallen, 31 tetor 2026- Kryesia u mblodh për të vlerësuar veprimtarinë shumëvjeçare, për të forcuar bashkëpunimin dhe për të diskutuar ide të reja në shërbim të vendlindjes dhe bashkëvendësve. Në një atmosferë të ngrohtë vëllazërore, miqësore dhe me frymë të lartë mirëkuptimi, më 31 tetor 2026 u mbajt një takim i Kryesisë së Shoqatës Humanitare „Lugina e Preshevës“ në Zvicër. Takimi kishte në fokus ecurinë e veprimtarisë së Shoqatës, kontributin e saj shumëvjeçar humanitar e kombëtar, si dhe mundësitë për zhvillimin e mëtejshëm të aktiviteteve në mbështetje të vendlindjes.
Në takim morën pjesë Fazli Musliu, arkëtar dhe kryetar nderi i Shoqatës, Xhavit Sherifi, sekretar, Bejtullah Beluli dhe Abdulla Veseli, anëtarë të Kryesisë, si dhe Dashnim Hebibi, kryetar i Shoqatës.
Bashkëbisedimi zgjati rreth tri orë, nga ora 17:30 deri në 20:30, duke dëshmuar interesimin dhe përkushtimin e pjesëmarrësve për çështjet që lidhen me të ardhmen e organizatës. Në fund, të pranishmit darkuan së bashku, me mikpritjen e Bejtullah Belulit, të cilin Shoqata e falënderon përzemërsisht. Për arsye shëndetësore nuk mundën të merrnin pjesë komandant Shefket Hasani dhe prof. Nasir Rrustemi, të cilëve iu dëshiroi shërim të shpejtë. Ndërsa Ferat Rashiti, për shkak të mysafirëve që kishte, nuk ishte i pranishëm, por përcolli përshëndetjet e tij.
Mbi dy dekada humanizëm, solidaritet dhe përkushtim
Një pjesë e rëndësishme e diskutimit iu kushtua rrugëtimit mbi 20-vjeçar të Shoqatës Humanitare „Lugina e Preshevës“ në Zvicër. U rikujtuan puna, angazhimi dhe kontributet e shumë njerëzve që ndër vite kanë dhënë kohën dhe energjinë e tyre për të ndihmuar bashkëvendësit dhe për të mbajtur gjallë lidhjen me vendlindjen. U theksua se kjo veprimtari përbën një histori solidariteti, e cila është dokumentuar përmes botimeve, materialeve arkivore dhe pasqyrimeve të ndryshme mediatike. Njëkohësisht, u nënvizua se Shoqata ka funksionuar mbi parimet e vullnetarizmit, transparencës dhe humanizmit. Angazhimi i anëtarëve nuk është motivuar nga përfitimet personale, por nga përgjegjësia morale dhe dëshira për të qenë pranë njerëzve në nevojë.
Ide të reja dhe përgjegjësi për të ardhmen
Gjatë takimit u shkëmbyen mendime dhe propozime të ndryshme për avancimin e veprimtarisë humanitare, kulturore dhe kombëtare të Shoqatës. Diskutimet u përqendruan në gjetjen e formave më të qëndrueshme të solidaritetit, në ruajtjen e kujtesës historike dhe në forcimin e lidhjeve ndërmjet bashkëvendësve. U theksua nevoja që ndihma të arrijë aty ku është më e domosdoshme, duke pasur në konsideratë familjet në vështirësi ekonomike, kategoritë e ndjeshme të shoqërisë, fëmijët, studentët dhe të gjithë ata që kanë nevojë për mbështetje. Po ashtu, u diskutua për rëndësinë e ruajtjes së traditave shqiptare, trashëgimisë kulturore dhe vlerave kombëtare, si dhe për mundësinë e ndërmarrjes së nismave të reja që do të linin gjurmë për brezat e ardhshëm. Të gjitha këto ide u trajtuan si propozime që meritojnë vëmendje, shqyrtim dhe bashkëpunim, duke respektuar mundësitë dhe kapacitetet e Shoqatës.
Ruajtja e identitetit dhe bashkëpunimi institucional
Një vëmendje e veçantë iu kushtua edhe ruajtjes së identitetit organizativ të Shoqatës, marrëdhënieve me organizatat e tjera dhe rëndësisë së bashkëpunimit institucional. U theksua se Shoqata duhet të vazhdojë të funksionojë me pavarësi, përgjegjësi dhe respekt ndaj strukturave të saj, duke qenë gjithmonë e hapur për bashkëpunim me të gjitha organizatat dhe individët që kanë qëllime të përbashkëta në shërbim të Luginës së Preshevës. Bashkëpunimi, mirëkuptimi dhe respekti i ndërsjellë u vlerësuan si parakushte për realizimin e çdo nisme që synon të mirën e përgjithshme.
Nderim për Ismail Qemalin në Kaninë të Vlorës
Gjatë takimit, kryetari Dashnim Hebibi njoftoi edhe për pjesëmarrjen e tij në një vizitë përkujtimore në Kaninë të Vlorës, në vendlindjen e Ismail Qemalit dhe te varri i tij, ku do të vendoset një kurorë me lule në emër të Shoqatës Humanitare „Lugina e Preshevës“. Kjo pjesëmarrje përfaqëson një gjest simbolik nderimi dhe respekti për një nga figurat themelore të historisë shtetformuese shqiptare, duke përcjellë edhe mesazhin se kujtesa kombëtare dhe respekti për personalitetet historike nuk njohin kufij gjeografikë.
Dokumentimi i historisë dhe kontributit të bashkëvendësve në Zvicër
Një tjetër çështje e trajtuar ishte rëndësia e dokumentimit të jetës, punës dhe kontributit të shqiptarëve të Luginës së Preshevës që jetojnë në Zvicër. U shpreh interesimi për iniciativa botuese dhe dokumentuese që do të pasqyronin historinë e bashkëvendësve tanë, rrugëtimin e tyre ndër vite, integrimin në shoqërinë zvicerane dhe lidhjet e pandërprera me vendlindjen. Një trashëgimi e tillë do të kishte vlerë jo vetëm për brezin e sotëm, por edhe për fëmijët dhe pasardhësit tanë, të cilët meritojnë ta njohin historinë e familjeve të tyre dhe kontributin e gjeneratave që ndërtuan jetën në mërgatë. Sa për rikujtim, SHHLP me vite ka organizuar dhe organizon Akademinë Përkujtimore të UÇPMB-së në Zvicër i vetmi kujtim për dëshmorët nën kujdesin e Fazl Musliut dhe Dashnim Hebibi.
Uniteti, respekti dhe vazhdimësia e një historie
Në përfundim të takimit u theksua se historia e Shoqatës Humanitare „Lugina e Preshevës“ është ndërtuar ndër vite falë kontributit të shumë njerëzve dhe se puna e të gjitha kryesive të mëparshme duhet vlerësuar e respektuar. Përgjegjësia e kryesisë aktuale është që këtë trashëgimi ta ruajë, ta zhvillojë dhe ta përcjellë më tej, duke vepruar me seriozitet, transparencë dhe përkushtim. U bë thirrje që të gjithë bashkëvendësit, pa dallime dhe pa barriera, të afrohen pranë Shoqatës dhe të kontribuojnë në veprimtarinë e saj. Çdo ide, çdo angazhim dhe çdo kontribut që vjen nga vullneti i mirë është i mirëpritur. Takimi u përmbyll me frymë mirëkuptimi, pajtimi dhe besimi se uniteti është themeli mbi të cilin mund të ndërtohet e ardhmja e Shoqatës. Mesazhi mbetet i qartë: Shoqata Humanitare „Lugina e Preshevës“ në Zvicër duhet të jetë një shtëpi e përbashkët e solidaritetit, respektit dhe përgjegjësisë kombëtare. Të ruajmë atë që është ndërtuar, të vlerësojmë ata që kanë kontribuar dhe të krijojmë mundësi të reja për ata që kanë nevojë për ne. Sepse humanizmi nuk matet vetëm me atë që japim, por edhe me gjurmët që lëmë te njerëzit. Në fund PhD. Dashnim Hebibi i dhuroi kryesisë edhe nga një libër që është botuar në janarin e këtij viti kushtuar ambasadorit të RMV në Zvicër, Shkëlqesia e Tij, Rexhep Demiri. Vëllazëria, respekti dhe solidariteti kanë kuptim të vërtetë vetëm kur i kultivojmë sa jemi gjallë.
Komisioni për informim i SHHLP
