Gjatë natës së së enjtes, në disa zona të ultësirës së Zvicrës ka rënë bora e parë e sezonit, duke sjellë një mëngjes të bardhë sidomos në Zvicrën Lindore. Pamjet nga qytete si Wil dhe St. Gallen tregojnë se bora ka qëndruar në tokë, duke krijuar atmosferën e parë dimërore të vitit.
Parashikimi i motit për fundjavën
Pas reshjeve të së enjtes, vendi do të përjetojë një rënie të ndjeshme temperaturash të premten dhe të shtunën. Megjithëse nga java e ardhshme temperaturat pritet të rriten lehtë, moti do të mbetet përgjithësisht i ftohtë në mbarë vendin, transmeton 20min.ch. Për ata që shpresojnë për një mëngjes të bardhë, e shtuna ofron mundësi të mira. Të premten, niveli i reshjeve të borës pritet të zbresë deri në zonat më të ulëta, duke sjellë mundësi për borë në ultësirë që gjatë ditës. Temperaturat do të luhaten nga –4 gradë deri në maksimum 2 gradë Celsius, ndërsa të dielën pritet një ngrohje e lehtë në rreth 4 gradë.
Në lartësi rreth 2000 metrash, i ftohti do të jetë më i mprehtë, ku parashikohen temperatura mes –11 dhe –9 gradë, duke krijuar kushte të favorshme për grumbullime të reja bore.
Sasia e borës së pritur
Ndërmjet së premtes në mëngjes dhe së shtunës, përgjatë zonave malore të Zvicrës pritet të bien 1 deri në 10 centimetra borë e re. Në paraalpe, në disa zona të izoluara, sasia mund të arrijë deri në 15 centimetra.
Këto reshje mund të sjellin vështirësi të përkohshme në qarkullim, por gjithashtu krijojnë kushte ideale për fillimin e aktiviteteve dimërore, transmeton 20min.ch, publikon helveticALforum.ch. (Foto ilustrim)
