Anëtarë, deputetë dhe drejtues të Partisë Demokratike zhvilluan sot homazhe në monumentin e Azem Hajdarit, në 27-vjetorin e vrasjes së tij.
Kreu i PD-së, Sali Berisha, e cilësoi Hajdarin si mbrojtës të fjalës dhe votës së lirë, ndërsa paralajmëroi se sot këto vlera janë më të rrezikuara se kurrë nga pushteti.
“Idealet e Azem Hajdarit, sot janë më kushtruese, më ftuese se kurrë që nga viti 1990 e gjer në këtë moment, mbasi Shqipëria është zhytur sot në formën më të shëmtuar të diktaturave, që është diktatura e drogës, krimit dhe vjedhjes së shqiptarëve. Sot pluralizmi për të cilin Azem Hajdari dhe studentët liberatorë ecën drejt sakrificave sublime, për rivendosjen në Shqipëri të pluralizmit, de facto është i shtypur, i dhunuar.
Sot fjala e lirë nuk ekziston, fjala e lirë është në satrin e xhelatit të pushtetit, si të ishte ajo në diktaturën tjetër. Sot është një ditë betimi për çdo demokratë, për çdo deputetë që të ngrihen për të shpëtuar demokracinë, pluralizmin dhe votën e lirë, fjalën e lirë. Të gatshëm për çdo çmim dhe sakrificë. Liria dhe dinjiteti kërkojnë sakrificë. Opozitarët shqiptarë do i tregojnë botës edhe një herë se ato janë në armiqësi me armiqtë e fjalës së lirë e dinjitetit njerëzor. Do rikthemë sërish në këtë vend vlerat e lirisë”, tha Berisha.
Azem Hajdari u vra më 12 shtator 1998 përpara selisë së Partisë Demokratike. Ai ishte lider i Lëvizjes Studentore antikomuniste të viteve 1990–1991 dhe më pas u bë një prej figurave kryesore të PD-së me vendosjen e demokracisë në Shqipëri, transmeton rtsh.