Deputeti i LDK-së konfirmon ambiciet për të marrë drejtimin e partisë, duke kërkuar një proces të hapur, demokratik dhe me konkurrencë të mirëfilltë.
Deputeti i Lidhjes Demokratike të Kosovës (LDK), Arben Gashi, ka konfirmuar ambiciet e tij për të kandiduar për kryetar të partisë, duke bërë të ditur se do të jetë pjesë e garës nëse ajo zhvillohet në mënyrë të hapur dhe demokratike. Gashi i bëri këto deklarata në emisionin “Pressing” në T7, ku u pyet për mundësinë e kandidimit të tij në zgjedhjet e ardhshme të brendshme të LDK-së. Ai tha se gjasat janë shumë të mëdha që të kandidojë, në rast se brenda partisë nuk arrihet një konsensus për një kandidat të vetëm dhe procesi kalon në garë të mirëfilltë zgjedhore.
“Gjasat maksimale janë që po, nëse do të kemi një garë të mirëfilltë, të hapur dhe demokratike”, u shpreh Gashi.
Gashi: Nëse hapet gara, do të jem kandidat
Deputeti i LDK-së theksoi se kandidimi i tij do të varet nga mënyra se si do të zhvillohet procesi i brendshëm dhe nëse do të ketë marrëveshje paraprake për udhëheqjen e partisë. Sipas tij, në rast se nuk arrihet konsensus për një kryetar, atëherë duhet të hapet gara dhe kandidatët të kenë mundësinë të paraqesin alternativat e tyre para anëtarësisë.
“Nëse nuk ka konsensus për ndonjë kryetar, hapet gara dhe do të jem. Nëse do të ketë konsensus paraprak, në kompromis nuk duhet të jemi destruktiv. Nëse hapet gara, do të jem kandidat”, deklaroi Gashi. Me këtë qëndrim, ai la të hapur mundësinë e kandidimit, duke theksuar se vendimmarrja duhet të respektojë proceset demokratike dhe interesin e përgjithshëm të partisë.
Gara për drejtimin e LDK-së
Deklaratat e Gashit vijnë në një kohë kur brenda LDK-së kanë nisur diskutimet për udhëheqjen e ardhshme dhe mundësinë e paraqitjes së kandidaturave të reja. Konkurrenca për drejtimin e partisë pritet të sjellë diskutime për të ardhmen politike të LDK-së, organizimin e brendshëm dhe strategjinë e saj për zgjedhjet e ardhshme. Mbetet të shihet nëse do të ketë një kandidat konsensual apo nëse anëtarësia e LDK-së do të vendosë përmes një gare me disa kandidatë. Arben Gashi, ndërkaq, ka bërë të qartë se është i gatshëm të hyjë në këtë garë, nëse ajo zhvillohet në kushte të barabarta dhe me standarde demokratike./BS
