/ Nga: Dashnim HEBIBI, Zürich /
Nder dhe privilegj – nga data 1 shtator 2025, Bekim Zogaj do të marrë zyrtarisht detyrën si Menaxher i Arbitrave në Futbollin Profesional në Federatën e Futbollit Zviceran.
Emër i njohur në futbollin zviceran dhe më gjerë, Bekim Zogaj është një shembull i përkushtimit, profesionalizmit dhe punës së palodhur. Nga një karrierë e suksesshme si arbitër – jo vetëm në Zvicër, por edhe në arenën ndërkombëtare – ai vazhdoi rrugëtimin e tij drejt niveleve të larta të drejtësisë sportive, tani në një rol të rëndësishëm drejtues.
Emërimi i tij si menaxher i arbitrave në një nga federatat më të respektuara të futbollit është një arritje e madhe dhe një moment krenarie për komunitetin shqiptar në Zvicër dhe më gjerë. Bekim Zogaj është një gjyqtar i njohur shqiptar nga Kosova, i cili ka ndarë drejtësinë në mbi 2400 ndeshje futbolli, përfshirë ndeshje të rëndësishme në arenën ndërkombëtare . Ai është i njohur për angazhimin e tij në futbollin zviceran dhe për pjesëmarrjen në turnire ndërkombëtare, duke përfshirë Kampionatin Evropian 2024 në Gjermani
Bekimi njihet si njeri i dashur, i sjellshëm dhe me vlera të larta familjare. Ai vazhdimisht mban lidhje të ngushta me Kosovën, duke e vizituar shpesh dhe duke qenë pranë komunitetit. Si qendër mediale, kemi pasur kënaqësinë ta intervistojmë disa herë, dhe së shpejti do të kemi edhe një bisedë të veçantë për këtë arritje të jashtëzakonshme.
Në emër të Qendrës Mediale Shqiptare në Zvicër – SAM24.info, i urojmë Bekim Zogajt shëndet, suksese dhe mbarësi në detyrën e re!
Ky është një super lajm për sot – një moment që na gëzon të gjithëve.
SAM24.info