/ Përgaditi: Dashnim HEBIBI, Zürich /
Zürich, 06 prill 2025 – Konsullata e Përgjithshme e Republikës së Kosovës në Cyrih, sot pati kënaqësinë të mirëpresë z. Kristian Zefi, koleksionist i njohur i artefakteve etnografike shqiptare. Me përkushtim të madh, z. Zefi ka krijuar një koleksion mbresëlënës të objekteve tradicionale – përfshirë veshje popullore, armë dhe vegla muzikore – të cilat paraqesin një dëshmi të gjallë të trashëgimisë kulturore shqiptare.
Gjatë takimit me Shefin e Misionit Diplomatik, z. Vigan Berisha, u diskutua për rëndësinë e këtij koleksioni në ruajtjen dhe promovimin e identitetit kombëtar në diasporë, si dhe për mundësitë konkrete të bashkëpunimit në funksion të prezantimit të kulturës shqiptare në Zvicër.
Z. Berisha, përmes këtyre takimeve të rregullta me personalitete të dalluara të mërgatës, po krijon ura të fuqishme lidhjeje dhe besimi.
Me përkushtim, profesionalizëm dhe modesti, ai po i bën bashkatdhetarët të ndihen të vlerësuar dhe të përfshirë, duke kthyer Konsullatën në një hapësirë mikpritëse që i ngjan shtëpisë për secilin prej tyre. Kjo qasje është dëshmi e vlerësimit të kontributit të diasporës dhe përpjekje për një përfaqësim dinjitoz të kulturës dhe interesave tona kombëtare jashtë vendit.
SAM24.info
