/ Nga: Dashnim HEBIBI, Zürich/
Me përfundimin e shkollës në Zvicër dhe fillimin e pushimeve pranverore, shumë bashkatdhetarë janë nisur sot drejt atdheut për të festuar Pashkët në gjirin e familjes. Shkollat në të gjithë Zvicrën kanë hyrë në pushim dyjavor dhe që nga dita e nesërme, nxënësit janë të lirë, çka ka bërë që shumë familje shqiptare të marrin rrugën drejt vendlindjes.
Sipas informacioneve të sam24.info, nga qytete të ndryshme si Cyrihu, Bazeli dhe Gjeneva, shumë mërgimtarë janë nisur me vetura për shkak të rritjes së çmimeve të biletave ajrore, ndërsa të tjerë kanë zgjedhur të udhëtojnë me aeroplan. Ata që nuk janë nisur sot pasdite, pritet të nisen gjatë ditës së nesërme dhe të shtunën. Kolona deri në 7 kilometra janë raportuar në drejtim të Italisë, konkretisht në tunelin e njohur Gotard, por mërgimtarët janë të mësuar me pritje të tilla dhe thonë se më e rëndësishme është të arrijnë mirë.
Pranvera, festa dhe kthimi në vendin e të parëve sjellin një emocion të veçantë. Fëmijët mezi presin të përqafojnë gjyshërit e tyre dhe të kalojnë kohë me ta, ndërsa të rriturit i gëzohen çasteve të bashkimit me prindërit, të afërmit e miqtë. Është bërë tashmë traditë që mërgimtarët të kthehen në atdhe për festat e mëdha si Pashkët, Bajrami apo Krishtlindjet, duke sjellë gëzim, jetë dhe atmosferë të ngrohtë në çdo familje.
Festat janë më të bukura kur ndahen me të dashurit tanë, dhe mërgimtarët e dinë më mirë se kushdo se sa vlejnë këto çaste bashkimi. Me familje e me miq, çdo festë ka më shumë hijeshi dhe kuptim — dhe bashkë me ardhjen e tyre, hijeshohet edhe vetë atdheu.
Në emër të redaksisë, ju urojmë pushime të mbara dhe gëzuar festën e Pashkëve!